Da ka Association thaw ki nongñiah Pick-up ha Ri Bhoi ban shakri ïa ka eh ka shon ki nongñiah kali

Nongpoh, Lber, 15: Ban ïa peit lem ïa ka bha ka miat bad ka eh ka shon jong ki Commercial Pick-up kiba kamai paidbah ha Ri Bhoi District, ki trai kali bad ki dribar mynta ka sngi ki la pynlong da ka jingïalang ban jied ïa ki nongkitkam na ka bynta ban ai ïa kata ka jingshakri ha ka lama ka Ri Bhoi Commercial Pick-up Owners and Drivers Association (RBCPODA).
Ïa kane ka jingïalang la pynlong mynta ka sngi ha Nongpoh, ha kaba ki trai kali ryngkat ki dribar ki la jied ïa ki nongkitkam ba pura ban shim ïa ka lyngkor nongïalam ban ai ka jingshakri na ka bynta ka bha ka miat ki trai kali bad ki dribar hapoh ka dong bad ka thaiñ Ri Bhoi.
Ki nongkitkam ba thymmai ka Ri Bhoi Commercial Pick-Up Owners & Drivers Association ki kynthup ïa u President ba la jied ïa u Bah Standwell Mani, Vice President Raplang Lyngdoh Nonglait, General Secretary Bitdor Pator, Assistant Secretary Teribor Papang, Finance Secretary Sami Kharnaior, Publicity Secretary Lugin Tmung, Organizing Secretary Ajay Rani, Office Secretary Fulbok Lyngdoh, Adviser Cleofast Marbaniang lem bad kiwei kiwei ki dkhot ka executive committee.
Kumba la pynpaw, da u President u Bah Standwell Manih, ka daw kaba la pynlong ïa ki trai kali Pick-up ba kamai paidbah ha Ri Bhoi bad ryngkat ki dribar ban thaw ïa kane ka Association, ka long ba ai lem ka jingshakri ïa ki para dribar bad kumjuh ruh ban peit lem ïa ka eh ka shon kita ki Dribar kiba ai ka jingshakri ïa ki paidbah ha Ri Bhoi District.
“Kum ki Dribar bad ki trai kali, ki la shim ïa ka rai ban ïa trei ryngkat ryngkat khamtam ban phai khmat lem ïa ka jingeh ki Dribar kiba kamai ha kaba shakri na ka bynta ki paidbah, ba bunsien ki ju ïa kynduh jingeh ha ki bynta bapher bapher kum kita ki Dribar kiba ai ka jingshakri ïa ki paidbah kum kita ki Dribar Pick-Up” ong u Bah Standwell Manih.