Shillong, Lber 15: Ka jinglum khajna na ka khalai siat khnam bad jingdie nombar tim ka la kiew da 148.57 percent hapdeng u snem 2022-23 haba ïanujor bad kiwei ki snem.
Ïa kane la pynpaw da ka kaiphod jong ka Comptroller and Auditor General (CAG) ha ka jingïoh lum pisa ka Jylla ha u snem ba kut ha ka 31 tarik Lber, 2023 ba la wanrah hapoh ka ïingdorbar Thaw Aiñ ha ka sngi Palei.
Ka la ong ba ka jinglum ïa ka khajna ka la kiew da 320.75 percent na ka T.0.53 klur (2017-18) sha ka T.2.23 klur (2018-19). Ka jingkiew ha u 2019-20 (T.2.91 klur) na u snem 2018-19 (T.1.19 klur) da 41.48 percent.
Hynrei, ka jingïoh lum pisa ka la hiar da 59.11 % (T.1.72 klur) ha u 2020-21 (1.19 klur) na u 2019-20 (T.2.19 klur). Ka jinghiar ka la bteng ha u 2021-22 (T0.70 klur) na u 2020-21 (T.1.19 klur) da 41.48 %.
“Hapdeng u 2022-23, ka jingïoh lum pisa ka la kiew da 148.57% (T.1.74 klur) haba ïanujor ïa u 2021-22 (T.0.70 klur),” ïathuh ka kaiphod.
Ka Tnad ka la pynpaw ba ka jinghiar ha ka jingïoh lum pisa ka dei namar ka jingkhangdam na ka khlam Covid-19.
Ka Tnad ka la pynpaw ba kam shym la buh ïa ka thong halor ka jingïoh lum ïa ka khajna na ka khalai siat khnam bad ka jingdie ïa ki nombar tim hapdeng kine ki snem ba la leh ïa ka audit.
