Shillong, Lber 15: Ha ka sienjam ban kyntiew ïa ka bha ka miat bad ka jingkynthup ïa baroh ki briew kiba don jingduna ha ki dkhot met, ka Composite Regional Centre for Skill Development, Rehabilitation & Empowerment of Persons with Disabilities (CRCSRE- Shillong) ha ka jingïatreilang bad ka Ophis Commissioner for Persons with Disabilities, Tnad Social Welfare, Sorkar Meghalaya ka la pynlong ïa ka “Prokram ai jinghikai halor ki skhim jong ka sorkar bad ki sienjam na ka bynta ki briew kiba don jingduna ha ki dkhot met (Divyangjan)” kaba la long dangshen ha Durbar Hall, Raj Bhavan, Shillong Meghalaya. Kane ka prokram ka la wanrah lang ïa ki tnad sorkar ba kongsan, ki NGO da ka jingthmu ban ai jinghikai bad ai jingtip shaphang ki skhim bapher bapher bad ki jingshakri ba don na ka bynta jong ki ha kylleng ka jylla Meghalaya.
Ïa kane ka prokram la pynïaid da u Chandrashekhar H. Vijayashankar, Lat ka jylla Meghalaya lem bad u Pravin Bakshi, Commissioner & Secretary sha ka sorkar Meghalaya, Dr. Ram Shakal Sahani, Director, CRCSRE- Shillong.
La saiñdur ïa ka prokram ban pynbeit ïa ki jingduna ha ka jingïoh jingtip bad pynkupbor ïa ki briew kiba don jingduna ha ki dkhot met da kaba pynthikna ba ki tip ïa ki sienjam jong ka sorkar ba la saiñdur ban pynbiang ïa ki jingdonkam jong ki. Ki tnad sorkar bapher bapher, ba kynthup ïa ka tnad Social Welfare, tnad ka koit ka khiah, tnad Livelihood, tnad pule puthi, tnad Employment and Labor, ki don ka bynta kaba kongsan ha kane ka sienjam. Lyngba ki jingpynshai bad ki bynta ba ai jingtip, ka CRCSRE- Shillong ka la ban jur ïa ki skhim bapher bapher jong ki, ki jingai jingshakri bad ki polisi ba la thmu kyrpang ban kyntiew ïa ka jingim jong ki briew kiba don jingduna ha ki dkhot met ha ka jylla.
Ka prokram ka la sakhi ïa ka jingïashim bynta shitrhem jong ki ophisar sorkar na ki tnad bapher bapher bad 169 ngut ki nongïashim bynta. Ki jingïalang ïamir jingmut ki la plie lad ïa ki ban buh jingkylli bad pynshai ïa ki jingartatien, ka la plie ka rynsan na ka bynta ki jingïakren. Ki nongïashim bynta ki la ïoh jinghikai shaphang ka rukom pyndonkam ïa ki application na ka bynta ki skhim bapher bapher bad mano ba lah ban ïoh bynta ha ki prokram bapher bapher.
Kane ka prokram ai jinghikai kadei tang ka jingsdang jong ka jingkut jingmut ban kyntiew ïa ka jingim jong ki briew kiba don jingduna ha ki dkhot met ha jylla Meghalaya. Lyngba ka jingbteng ïa ki sienjam ai jinghikai, ka CRCSRE- Shillong bad ka tnad social welfare ka la khreh ban wanrah ïa ka imlang sahlang ba ïoh bynta lang baroh ha kaba man u briew, khlem da peit ïa ka jinglah kot bor, ki ïoh ka lad ban kiew shaphrang.
