Nongpoh, K’lyngkot 08: Ka Seng Hynniewtrep Integrated Territorial Organization (HITO), Ri Bhoi District, mynta ka sngi ka la byrngem syndon ban hiar surok, lada ym lah ban pynsangeh ïa ka jingkynnoh lum pisa na ki kali kit syiar ha ka surokbah National Highway-6 ha Ri Bhoi District, ba ka seng ka ju pyrshah ban wan ki kali kit syiar na shabar ka jylla ba ka ktah ïa ki nongri syiar hapoh ka jylla.
Kane ka jingbyrngem ka seng HITO ka dei hadien ba mynta ka sngi, ha ka jingïalam u President u Bah Shaniah Nongrum ki la thmu ban ïa kynduh ïa u Deputy Commissioner ka Ri Bhoi, u Abhilash Baranwal ban dawa mardor ban pynsangeh ïa katei ka jinglum pisa bad namar ka jingbym don u Deputy Commissioner ka seng ka la shu aiti da ka shithi ujor ban shim khia halor kane ka phang ba la wan rah da ka seng.
Haba ïa kren bad ki Nongthoh Khubor, u President ka HITO Ri Bhoi District, u la ong ba ka seng ka la dep ban ai da ka shithi ujor sha u Deputy Commissioner ka Ri Bhoi, ban dawa mardor ba dei ban tohkit bad ban pynsangeh ïa kane ka jinglum pisa na ki kali kit syiar bad lada ka bor synshar district kam shim khia ka seng ka la long kaba la kreh ban hiar surok ban ïa pyrshah ïa kane ka jinglum pisa jubor na ki Kali kit syiar.
U la kynnoh ruh ha kane ka jinglum pisa na ki Kali kit syiar la don kti ruh ki nongïalam ka All Meghalaya Poultry Suppliers and Retailers Association bad kiwei kiwei kiba don ha ka bor bad ka seng kan nym ailad ban don kum kane ka jinglum pisa beaiñ kaba ktah ïa ki paidbah.
U la ong ruh ba ka sneg ka pyrshah jur ïa ka jingwan poi kine ki syiar na shabar ka jylla, namar kane ka ktah ïa ki samla kiba ri syiar ha ka jylla bad ïa kane ka phang ka seng ha ki snem ba la dep ruh ka la dep ban pynpaw ba ka pyrshah ïa kane ka jinglum pisa ne ka jingwan poi ki syiar kiba na shabar sha kane ka jylla Meghalaya.
“Ka seng ka sngewkhia ruh ba ka jingwan poi ki syiar bad kynthup ruh naduh ki masi bad ki sniang ka buh jingma ïa ka koit ka khiah ki paidbah ba bam, namar kumba la ioh lum jingtip ka seng, kam don satia kano kano ka jingwad bniah da ki Doctor lyngba ka tnad Veterinary” ong u Bah Nongrum, Presdient ka HITO Ri Bhoi bad uba dei ruh u Nongsait aiñ, bad bynrap ruh ka seng kam kwah ba kin poi ki syiar kiba ngim lah ban tip lada bam ka lah ban ktah ïa ka koit ka khiah ki paidbah khlem da don shuwa kata ka jingwan bniah da ki doctor ka tnad Veterinary” u la bynrap.
Shuh shuh, u la ong ruh lyngba katei ka shithi ba la ujor sha u Deputy Commissioner ka Ri Bhoi, ka seng ka la dawa mardor ba ka bor synshar District kan tuklar mardor ïa kane ka jinglum pisa kaba la poi haduh T. 30 hajar kawei ka kali bad lada ka bor synshar District kam shim khia ka seng ka la long kaba kloi ban hiar surok ban ïa pyrshah halor kane ka jingshalan syiar beain bad kaba la shu lum pisa jubor, u la bynrap.
