Bynñiaw ki khynnah ïalehkai ka jylla ba pynslem ka Sorkar ban pyllait ïa ka khusnam pisa

Shillong, Lber 27: Ka kynhun ki khynnah ïalehkai na ki synjuk (Association) bapher bapher hapoh ka jingïalam jong u Bah Pynshai Mawrie u ba dei u dkhot jong ka Meghalaya School of Martial Arts, ki la wan shakhmat ban ïakynduh ïa ki lad pathai khubor hynne ka nohphaisngi jong ka Sngi Balang, ban kren ïa ki mat ha kaba ïadei bad ka jingpynslem jong ka Sorkar ban sam ïa ki khusnam pisa sha ki samla ïalehkai kiba la jop takma ha ki rynsan ïakop bapher bapher na bynta u snem 2022-23.
Haba ïakren sha ki lad pathai khubor na ka liang jong u Bah Pynshai u la ïathuh ba kitei ki samla ïalehkai ki bym pat shym la ïohpdiang ïa ka song khusnam ki dei kiba mihkhmat ha ka kick boxing, muthai, arm wrestling, Jeet Kune Do bad kiwei kiwei, da kaba bynrap ba ka jingpynslem jong ka sorkar ban pyllait ïa ka khusnam pisa kan khanglad bad pynduh mynsiem ruh ïa ki khynnah ban dang leit ïashimbynta ha ki rynsan ïakop shabar.
“Ka jingpynsah ban pyllait ïa ka song khusnam ka long ka jingduhnong ïa ki khynnah naba bun ki khynnah ïalehkai ki wan na ka longïing kiba duna ha ka ïoh ka kot bad lada khlem ki lad jingïarap kan long ka jingeh ïa ki ba kin leit ïashimbynta ha ki lympung shabar,” la ong u Bah Pynshai.
Nalor kane, u Bah Pynshai u la kyntu ruh ïa ka tnat ïalehkai ba ka dei ban bhah mar katjuh ka song khusnam ïa baroh ki kyrdan, la ka dei ha ka Junior, Sub-Junior bad kiwei kiwei namar ka jinglut hi ka long mar katjuh ïa ki khynnah ne ïa kiba rangbah lada ki leit ïashimbynta shabar.
Barabor kumba long ha ki snem ba ladep, ha ka National Level jong ki Seior ka tnat ïalehkai jong ka Sorkar Jylla Meghalaya ka la bhah 60 hajar na bynta ki khynnah ba khur takma ksiar, 45 hajar-takma rupa bad 30 hajar kiba jop takma rnong, bad ka dang duna haba nujor bad ki Junior, sub- Junior bad kumta ter ter.
Ha kaba ïadei bad kane ka jingpynsah teng jong ka tnat Sports ban pyllait ïa ka khusnam pisa kaba la ïaid mynta la shi snem, na ka liang jong ka kynhun ka la ïoh ban leit ïakynduh ïa ka Director jong ka tnat Sports & Youth Affairs ka Sorkar jylla kaba la jubab ba ïa kane ka khusnam pisa na ka liang jong ka Sorkar ka dang pynkhreh ban pyllait bad sam noh sha ki.
Shuh shuh, u Bah Pynshai u la pynpaw ba ki don ki synjuk kiba shah tharai sniew ruh wat ha ki kmie ki kpa jong ki khynnah ïalehkai namar ka jingbymlong ryntih ban bynta khusnam pisa sha ki khynnah ïalehkai.
“Wat hapdeng ki khynnah ba mih madan ha kajuh ka rynsan ïalehkai….ki don kiba ïoh ki don ruh ki bym ïoh kaba la wanrah ïa ka jingtharai sniew wat ha ki kmie ki kpa ïa ki nongïalam jong ki synjuk bapher bapher,” la bynrap u Bah Pynshai.