Mairang, Lber, 27: Ka jingïohpang jong kawei ka longïing na ka shnong Riangmang, Eastern West Khasi Hills District hadien ba ki la bam ïa ka doh sniang ba ki la thied na uwei u nongdie doh uba ju die doh hapoh shnong ka la pynlong ïa ka shnong Riangmang ba kan tait shnong ïa une u nongdie doh hadien ba ka Dorbar ka la rai pynrem ïa u kum u nong aibih.
Katkum ka jingïathuh u Bah Khotkupar Lyngdoh Nongum ha ka jingïakynduh bad ki lad pathai khubor hadien khyndiat kynta ba u la ujor da ka ejahar ha ka ophis u Superintendent of Police ka Eastern West Khasi Hills District pyrshah ïa ka shnong Riangmang, u la ong, ba ka jingïohpang jong ki briew kiba bam ïa ka doh ba u die ka dei naduh ka 28 tarik, Rymphang 2024 bad hadien ka jingkem pang ki la leit shim dawai na Mairang bad ki doktor ki la ïathuh ba ka jingpang ka dei na ka bam hynrei kine ki briew hadien kata ki leit shim dawai sa na u kobiraij.
U Bah Khotkupar ula ïathuh ba ha ka jingleit ïa kynduh ïa ki, kine ki briew kim shym la kynnoh ba u dei uba ai bih hynrei kyndit kynsan ha ka 22 tarik u Lber 2024 ka shnong Riangmang ka la tait shnong ïa u.
U Bah Khotkupar u la ong ruh ba u shaniah ha ki bor jong ka aiñ ba kan ai ïa ka jingbishar kaba hok namarba u khlem leh kumba u la shah pharep ha ka shnong Riangmang ba u dei u nong aibih, u nong ai ksuid bad kiwei kiwei ki jingshah kynnoh.
