Bym treikam shuh ka ophis Soil and Water Conservation ha Laskeiñ pan jingshai ka HITO

Jowai, Lber 28: Ka Hynñiewtrep Integrated Territorial Organization (HITO) Laskeiñ Area hapoh ka jingïalam u President u Nimain Lyngdoh lem bad ki dkhot hynnin ka sngi 27 tarik Lber kila aiti ïaka dorkhas ha ka ophis jong u Divisional Soil and Water Conservation Jowai bad ban pan jingshai halor ka ophis jong katei ka tnad kaba don ha ka shnong Laskeiñ West Jaiñtia Hills District kaba la khang khyrdep la bun snem khlem ka jingtreikam shuh.
Halor kane na ka liang ka seng ka kwan ban ïoh ïaka jingpynshai na katei ka ophis hato katei ka tnad kan dang pyntreikam ne em ïakatei ka range ophis kaba don ha Laskeiñ.
Ha ka jingïakynduh bad u heh katei ka ophis ha Jowai kitei ki nongïalam ka seng kila pynpaw ka jingsngewsih halor ka jingbymtreikam shuh katei ka ophis, kila ong ba kane ka long ka jingduh nong kaba khraw eh ïa ka shong ka thaw bad khamtam ïa katei ka thaiñ hi baroh kawei.
Ka seng ka dawa jur na ka sorkar ba kan shimkhia ïa kane kam khnang ba kan long ka jingmyntoi na ki paidbah nongshong shnong, hadien kane ka jingleit pan jingshai ka seng kan sa buddien ïa kane bad ban leh ïa kaba donkam.