Nongstoiñ, Nailur 26: Ka Federation of Khasi Jaiñtia & Garo People Rimuliang Circle, ka pynpaw ïa ka jingsngewkhia kaba jur halor ka jingbym pat don ka surok kaba biang ha ka thaiñ Umthli, kaba la wanrah shibun ki jingeh ïa ki nongshong shnong, khamtam ha kaba ïadei bad ka leit ka wan bad ka roi ka par jong ka thaiñ.
Ki nongshong shnong ka thaiñ Umthli bad ki shnong kiba marjan ki dang mad ïa ki jingeh kiba khraw namar ka jingbym don ka surok kaba biang. Kane ka ktah ïa ka leit ka wan jong ki paidbah, ka khaïi pateng, ka pule puthi, ka koit ka khiah bad kiwei kiwei ki kam ba man ka sngi.
Na ka liang ka FKJGP Rimuliang Circle, ka la ïoh lad ban ïohi bad sngewthuh ïa kane ka jingeh haba ka la leit ïashimbynta ha ka jingïalang paidbah, kaba la long ha ka shnong Umthli ha ka 23 tarik Nailur 2026. Ha kane ka jingïalang, la ïohi ïa ka jingshisha jong ka jingeh kaba ki paidbah ka thaiñ ki dang mad haduh mynta.
U President jong ka seng Bah Serbilin Lyngdoh u la ong, “Ka long kaba sngew synei ba ki paidbah ki hap ban ïaid kjat da ki kynta, watla ka don ka surok khlaw kaba la shna da ki nongshong shnong hi. Hynrei, kane ka surok kam pat long kaba biang ban ïaid kali, khamtam eh ha ka por lyiur haba jur ka slap bad ka jinglong ka surok ka nang sniew”.
U la ong, “Na ka liang ka Seng, ngi dawa jur ïa ka Sorkar Meghalaya, khamtam ïa u MLA ka Rambrai Jyrngam Constituency, Bah R.G. Momin, ba un shimkhia mardor ïa kane ka jingeh jong ki paidbah bad ban wan jurip hi dalade ïa ka thaiñ Umthli, khnang ban ïohi bad sngewthuh ïa ka jingshisha jong ka jingeh kaba ki paidbah ki mad”.
“Ka Seng ka kyntu ruh ïa U MLA ba un ïakren bad ki tnat ba dei peit jong ka Sorkar bad ban shim ïa ki sienjam kiba donkam ban pynbha ne shna ïa ka surok kaba bïang ha Umthli, kum kawei na ki mat ba kongsan ha ki kam pynroi jong ka thaiñ”, u la ong.
Nalor kata u la ong, “Ka surok kaba biang ka long kawei na ki bynta kiba kongsan ban kyntiew ïa ka roi ka par, ka ïoh ka kot bad ka jingim jong ki nongshong shnong.Ka surok kaba biang kan ïarap ïa ki paidbah ha ka leit ka wan, ka khaïi pateng, ka pule puthi, ka koit ka khiah bad ka jingsam ïa ki jingshakri paidbah”.
U Bah Serbilin u la ong, “Ka thaiñ Umthli ka don ruh ïa ki marrep kiba kongsan, kum u kwai, u tympew, ki soh, ki kait bad kiwei kiwei ki mar rep. Hynrei, namar ka jingbym don ka surok kaba biang, ki nongrep ki mad jingeh ha ka ban pynpoi bad die ïa ki marrep jong ki sha ki jaka ïew, kaba lah ban pynlong ïa ki ban duh nong”.
“Ka Seng ka dawa ba dei ban shimkhia noh mardor ïa kane ka mat bad ban sdang ïa ki kam kiba donkam ban pynbha ne shna ïa ka surok kaba biang ha ka thaiñ Umthli. Ngi kyrmen ba U MLA ka thaiñ un sngap ïa ka sur jong ki paidbah bad un shim ïa ki sienjam kiba donkam ban pynbeit ïa kane ka jingeh kaba la slem bha, khnang ba ki nongshong shnong ka thaiñ Umthli kin ïoh ïa ka leit ka wan kaba suk, kaba shngaiñ bad ka lad ban kyntiew ïa ka ïoh ka kot bad ka roi ka par jong ka thaiñ” u la ong.
