Leit buh syntiew u Myntri ha u lum jingtep u Maieid Hopingstone Lyngdoh ha shnong Mawkyllei

Mairang, Nailur 27: Ha ka sngi saitjaiñ ka 26 tarik Nailur kaba dei ka lyngkhuh snem ba khatwei jong ka jingkhlad noh u (L) Maieit Hopingstone Lyngdoh u bah Methodius Dkhar Myntri sorkar uba peit ïa ka tnad Labour bad Civil Supplies jong ka sorkar u la hiar sha ka shnong Mawkyllei Eastern West Khasi hills district ban leit buh syntiew ha u lumjingtep jong u (L) Maieit Hopingstone Lyngdoh.
Ha katei ka sngi la synran lang ïa u Myntri da ka kong Badariti Lyngdoh Nonglait bad kiba ha ha sem.
Ha katei ka sngi na ka liang ka Hill State People Democratic Party kam shym la pynlong jingïalang satia ha ka shnong Mawkyllei namar ka don kawei pat ka programe ba kham kyrpang ha Shillong.Wat la katta ruh na ka liang u bah Methodius Dkhar kum u nongmihkhmat na ka party hadien ba u la dep ban buh syntiew bad thang ïa ki mombati ha u lum jingtep jong u Maieit u la ai ka jingkren ba lyngkot ha kaba ïadei bad ka jingleit buh syntiew ha utei u mot.
U bah Methodius ha ka jingkren ba lyngkot ha khmat utei u mot u la ong ban wat la na ka liang ka party kam shym lalah ban pynlong jingïalang ha katei ka jaka hynrei u hap ban wan buh syntiew namar lada um ïoh ban leh ei ei ha kaba kum katei ka sngi u sngew lymboit bad um sngew dei namar yn ym don shuh uwei pat u rangbah kum u (L) Maieit Hoping uba la ai ka jingshakri kaba bha tam ïa ka jaitbynriew lyngba ki skul kiba u la seng, ka jingdawa jylla ba pura haduh ba kan da urlong bad ïoh syndon ïa ka jylla ha ka 21 tarik Kyllalyngkot 1972.
U la ong ruh ba kiwei pat ki kam kiba khraw kum ka jing ïaleh ban ba khanglad ïa a jingtih ïa u Uranium na ki bynta ka ri Khasi Jaiñtia bad kiwei iiwei lki kam kiba khraw kiba u la leh ki pyn ktik ïa ka mysiem jong u bad um sngew lah ban shu sngap khlem da pynpaw kino kino ki dak ban sah jingkynmaw.
U la ong ruh ba kum ba u (L) Maieit Hoping u la ïalam lynti un ïaleh katba lah ban bud ïa ki dien jat jong u wat la u sngewthuh shai ba un ym kot bor ban leh kumba u maiet u lah hynrei un ïai pyrshang katba u lah ei.
Khatduh eh u la ong ba u angnud bad u kwah eh ba dei ban tei ïa u mot dur ba shirynïeng jong u (L) Maiet Hoping ha kano kano ka jaka kaba kham long sor bad jaka pdeng khnang ba ha kano kano ka por ba ka tarik ka ïatyngkhuh bad kiwei pat ki kam ba kham don kam kin ïoh lad ban leit buh syntiew.
Ha kaba ïadei bad ka jingrakhe ïa katei ka lynkhuh snem ba khatwei jong ka jingkhlad noh u Maieit Hoping la ïoh jingtip ban a ka liang ki paitbah nong shnong shnong jong ka Raidmynsaw ki la rakhe lypa ha ka sngi thohdieng ka 25 tarik Nailur ha Langpih ha kaba la ïashim bynta da ki rangbah shnong, ki nonghikai jong ka Raidmynsaw Upper &Secondary School, khynnah skul bad ki paitbah nongshong shnong ha kaba u bah K.P.Pangñiang president rangbah ka Hill State People Democratic Party u la ïadon ryngkat bad ïashim bynta ha kaba buh syntiew ha u mot sah jingkynmaw ïa u (L) Maiet Hoipng ba la tei da ka hima Raidmynsaw ha khmat ka ïew Langpih.