Bym shimkhia ki bor sorkar, hap kit khlieh hi ka Managing Committee ban shna kamra skul

Mawkyrwat, Rymphang 22: Ka long kaei kaei kaba pynkmen shibun ïa ki nongpynïaid skul bad kumjuh ruh ïa ki nonghikai ba ki khynnah ki don mynta ban ïa beh sha ka thong jong ka jingnang jingstad ha kiba kum kine ki sngi jong ka jingïakop ha kiba bun ki liang, ha kaba la sakhi mynta ha kawei ka skul kaba don ha kawei ka shnong ba kham kyndong kaba jngai kumba 16 km ei ei na Mawkyrwat.
Haba phai pat sha ka ‘Pyndenlyngdoh Pres. Lower Primary School’ kaba dei kawei na ki skul ba don ha shnong Pyndenlyngdoh, South West Khasi Hills District kaba la seng naduh u snem 1960 bad kaba la ïaid mynta la kumba 64 snem ei ei bad mynta u snem ka la shem jingeh shibun ban pdiang ïa ki khynnah nongwan rung skul namar ka jingbym biang shuh ki kamra klas.
Namarkata, ha kaba ïa dei bad kane, u nongthoh khubor haba ïoh ban ïa kren bad ki nonghikai kumjuh ruh bad ki kmie ki kpa ki la pynpaw ka jingsngewsih namar ka jingbym biang bad jingkhapngiah ki kamra klas ka la pynlong ïa ka Managing Committee ban kan shim kyrkih ban pynkha kamra klas tang ban ym pynduh shong skul ïa ki khynnah rit. “Ha kane ka ‘Pyndenlyngdoh Pres. Lower Primary School’ ka don tang 3 tylli ki kamra klass bad kawei ka ïing trep ba shu shna kyrkieh da ka Managing Committee bad 7 ki klas, na ka bynta 2 ngut ki nonghikai”, la ïathuh u nonghikai.
Shuh shuh ki nonghikai ki la pynpaw ruh ba ha une u snem 2024 haba ïa nujor bad snem 2023 ka jingdon ki khynnah skul ruh ka la kiew sha ka 80 ngut kata 130 ngut ha u snem 2023 bad mynta pat ki la don haduh 210 ngut ki khynnah kiba wan pule. Kumta ki la pynpaw ba lada ym pdiang shuh shuh ruh kat kum ka hok ban ïoh ka jingnang jingstad ne ka Right to Free Education kam shah ban kyntait namarkata, ym banse ban pdiang bad lada pdiang ruh kumno yn leh namar la khap-ngiah.
Haba phai ha ki jingïarap ha kane ka skul kaba la palat 60 snem naduh ba la sdang ïa ka, kam pat ju ïoh ei ei la ka long ha ka liang ki infrastructure na ka tnad pule puthi jong ka sorkar Meghalaya, hynrei kiei kiei baroh la hap ban kit-khlieh hi da ka Managing Committee bad na ki nonghikai.
Namarkata, ki nonghikai bad ki kmie ki kpa ki la buh ka jingkyrpad ïa ka sorkar lyngba ka tnad pule puthi ba kam dei ban shu sngap halor kane bad kumjuh ruh ïa ki MLA ne ki MP ba ki kular jingïarap tang shwa ka elekshon hynrei kin sngewbha ban phai khmat noh mynta mynta sha kane ka skul namar ka la donkam kyrkih eh khnang ba kan ym long ka jingduh nong ïa ki khynnah rit kiba don ka jingthrang ban wad ïa ka jingnang jingstad naduh ba ki dang rit karta.