Jowai, Rymphang 22: Ki dkhot ka Scouts-Guides Movement kiba don ha kylleng ka Ri jong ka pyrthei ha kane ka 22 tarik u Rymphang kila kynmaw burom ïa ka ‘World Thinking Day / Founder’s Day’, na ka liang ki bor pynïaid jong ka Bharat Scouts and Guides, West Jaiñtia Hills mynta ka sngi kila pynlong ïa ka prokram ïakynduh lang ha ophis treikam ka District Association kaba don ha Jowai.
Ha ka jingïalang leh burom la pynïaid da ka C. D. Laloo, District Commissioner Guides, MBSG-WJHD, ha kaba ka Dolly Lamare, District Organiser Guides WJHD kala ai ki kyntien lamphrang halor ka thong jong kane ka prokram kaba dei ka sngi kha u Lord Baden Powell bad ka Agnes Baden Powell kiba long ruh ki nongseng jong ka Scouting ha u snem 1907 bad ka Guiding ha u snem 1910.
U DE Pariat, Commis sioner MBSG, kam u symbud kongsan jong kane ka prokram ula ai ki kyntien shaphang kane ka sngi da kaba ai mynsiem ïa ki dkhot ka Movement ba kin trei ïa ka kam na ka bynta ka jingbha jingmiat haka imlang ka sahlang katkum ka thong bad ka nongrim jong ka Scouts – Guides Movement.
Shuh shuh la ai ka jingkren naka S. Tariang, Vice-President MBSG-West Jaiñtia Hills, kaba la pynsngew ba kane ka jingïakynduh lang mynta ka sngi kan wanrah ïa ka jingïalong kawei, ka jingïatylli bad ka jingïaburom mar kylliang, khnang ba yn lah ban pynïaid shakhmat ïa ki kam khlem kano kano ka jingïapher jingmut.
Halor kane ka phang kaba ong “Our World, Our Thriving Future: The environment and Global poverty”, na ka liang ka S. Tariang kala buh ka jingkyntu ïa ki dkhot ba kin wad ki lad ki lynti ban rat diengkhong ïa ka jingduk, kala kyntu ban kyntiew ïa ka pule ka puthi bad ban pynneh pynsah ïa ka jonglong kyrpang jong ki sawsong sawkun jong ka mei mariang.
Ha kane ka sngi la pynlong ruh ka jingsam ïa ki Syrnot sha ki ar ngut ki Scouts Master kiba la pyndep ïa ka HWB Course na Assam kiba kynthup ïa u Adiam u Bthuh, District Secretary MBSG-WJHD bad u Pet Dhar, District Commissioner Scouts, WJHD. Katba ïa ki kyntien ai khublei la ïoh na u C. Gassah, District Organizer Scouts, WJHD.
