Nongstoiñ, Rymphang 21: Namar ka jingjur palat kiba thang ïa ki lum ha kine ki sngi, ka seng ki Nongrep ka Hills Farmer Union West Khasi Hills District hapoh ka jingïalam u Bah Lumlang Kharsyiemlieh General Secretary West Khasi Hills District, ha ka jingsynran ki para nongrep bad u General Secretary ka HFU Sengkmie Bah Alfonbirth Kharsyntiew, ha ka sngi balang ka la leit ïakynduh ïa u Deputy Commissioner ka West Khasi Hill District Sahep Garod LSN Dykes.
Ki nongrep lyngba ka Hills Farmers Union West Khasi Hills District, ka kyntu na u khlieh ka District ban ïarap lem, lada ka don ka jingpyrkhing katkum ka aiñ, namar kane ka jingjur kiba thang lum ka la ktah eh ïa ki nongrep kiba thung dieng bad ruh na ka bynta ka lawei ki khun ki kti.
Kum ban shu kdew, na ka liang ki nongrep na thaiñ Mawlangkhar, Mawpun, Area Nongkhnum bad kiwei ki jaka, ki la sdang thung dieng khamtam kito kiba don jaka ban thung dieng ne lum syllen. Hynrei sngewsih pat ki riew pynjot mariang ki bym don ka jingtip lem ïa ki para briew, ki la thang kat ban pynjot ïa ka jingtrei shitom ki nongrep kaba la long ka jingduhnong ïa ki nongrep bad jingtrei shitom ka la duhei.
Na ka liang ka u DC u lah kular ban ban shimkhia bad u la ong ban pynjari 144 CRPC ban khanglad bad ban bthah ïa ki shnong lyngba ki BDO ba dei ban peit bha. Lada don dei ban aiti ha ka kti ki pulit ban leh kaba donkam. Lada lap ïa ki ba thang lada ïoh kem kan sa pynduh jait ïa kitei ki jait briew.
“Na ka liang ngi ka seng nongrep ngi ai khublei shibun ïa u DC ba u la shimkhia. Ngi ngeit nangne shakhmat kan ai mynsiem ïa ki nongrep ban thung dieng, lada ngi ïoh ki Officer kiba ïarap ban don ryngkat bad ki paitbah nongrep. Kane ka kam thang lum ka long kham palat ban ïa kaba shah tuh ïa ki nongrep”, ong u Bah Lumlang Kharsyiemlieh General Secretary HFU West Khasi Hills District.
