Bun kiba wan pynbor lah ban ïakhun MDC u bah Pynshai Manik Syiem na Mylliem

Shillong, Kyllalyngkot 13 : Namar ki don bun kiba la wan pynbor ïa u bah Pynshai Manik Syiem ban ïa aireng ha kane ka election MDC sha KHADC kumta une u rangbah uba la long teng u MDC jongka Mylliem bad Laitkroh haduh 15 snem lynter bad kum u MLA ka Mylliem haduh 15 snem lynter,la ïoh jingtip ba mynta ka kynti ruh u lah ban ïa aireng biang na ka Mylliem Constituency.
Ka jingwan pynbor ïa u bah Pynshai ka long eh khamtam na kito ki shnong kiba ieit bad ju kyrshan tylli ïa u ha ka por ba u long kum u MLA bad MDC. Nalor kata ki shnong kiba ju hap ha ka Laitkroh Constituency mynshwa mynta ki la hap sha ka Mylliem Constituency bad wat ka Laitjem bad Sadew ruh mynta ka hap sha ka Mylliem Constituency kine ki dei ki shnong kiba ju kyrshan tylli bha ïa u bah Pynshai Manik Syiem.
Lada u bah Pynshai Manik Syiem u rai ban ïakhun kan buh ïa kiwei ki kyrtong ba thymmai jongka NPP, VPP, Congress, UDP ha ka jingeh namar une u dei u briew uba la rim bad shem phang ha ka politik bad lehse ki paidbah ruh ki kwah ban ailad biang ïa u sa shisien namar u dei ruh uwei na ki nongmihkhmat uba trei bha na ka bynta ki paidbah ha ka por ba u dang long MDC bad MLA.