Hiar ka jingïoh lum khajna ka KHADC da 49 % ha u snem 2018-19

0

Shillong, Kyllalyngkot 13 : Ka jingioh lum khajna jongka Khasi Hills Autonomous District Council (KHADC) ka hiar da 49 % kata na ka 127.85 klur tyngka ha u snem 2017-18 sha ka 64.66 klur ha u snem 2018-19.
Kane ka jinghiar ka jingïoh khajna ka KHADC ha u snem 2018-19 ka dei na ka daw ba ka la don ka jingpynduna haduh 69 % na ka Grants-in -aid bad 68 % ka jingpynduna na ka bhah khajna Royalty ha ki mar poh khyndew, ong ka kaiphod CAG.
Kane ka jingpynduna ïa ka Grant-in -aid ka dei namar ba ka don ka jingbym pyllait pisa da kaba kyntait noh kat kum ka Part IX bad IX A jongka Riti synshar jongka ri da ka sorkar pdeng.
Kumjuh ruh kane ka jinghiar ka khajna Royalty ka dei namar ka don ka jingbym pyllait pisa na ka bhah khajna ki mar poh khyndew ( minor minerals0 na ka bynta u snem 2018-19.
Ha u snem 2018-19 ka KHADC ka ïoh ïa ka Grant-in-aid tang 9.95 klur, ka khajna royalty na ki mar poh khyndew ka long 22.72 klur bad ka khajna na ki kali ka long 12.74 klur kaba long tang 70 % na katei ka khajna ba la ïoh lum 64.66 klur. Kumta ka KHADC ka shaniah ïa ka fund kumba 70 % ban wan na bar namar na lade ka lah ban pynmih fund tang kumba 30 %.
Ka CAG ka kdew ba ka jingpynlut jongka KHADC ka kiew da 27 % kata na ka 45.95 klur ha u 2017 -18 sha ka 58.58 klur ha u 2018-19. Kane ka jingkiew ka jingpynlut ka dei ha ka jingsiew tulop bad ki jingpynlut ha ka Secretariat General Service.

Leave A Reply

Your email address will not be published.