Buddien ka Tnad Kam Pohïing (MHA) ïa ka jinglong jingman jong ka aïom slap ha kylleng ka ri

New Delhi, Naitung 23: Ka Tnad Kam Pohïing (MHA) ka dang buddien bha ïa ka jinglong jingman jong ka aïom slap ha kylleng ka ri. Hapoh ka jingïalam jong u Myntri Rangbahduh ka ri u Narendra Modi bad ka jingpynïaid jong u Myntri Kam Pohïing jong ka sorkar pdeng u Amit Shah, ka MHA ka ai baroh ka jingkyrshan kaba donkam sha ki jylla bad ki Union Territory ba shah ktah ha kaba pynbeit ïa ki jingeh kiba mih na ka jingjur u slap.
Ha u bnai Naitung, 2026, ka ri ka la mad ïa ka jinghap slap kaba jur bad ka jingtwa khyndew ha ki katto katne ki bynta kum ha Nagaland, Arunachal Pradesh, West Bengal, Assam, Gujarat, Maharashtra, Dadar bad Nagar Haveli, Daman, J& K bad kiwei kiwei ki jaka.
Ka Integrated Control Room (ICR-ER) jong ka Tnad Kam Pohïing ka dang ïatreilang bad kiwei pat ki tnad sorkar pdeng ba kynthup ïa ka India Meteorological Department (IMD), Central Water Commission (CWC) bad ka Indian National Centre for Ocean Information Services (INCOIS) na ka bynta ban pynpoi ïa ki jingpynbna ha ka por kaba biang sha ki State Emergency Operation Centre bad ki District Emergency Operation Centre. Nalor ka jingpynsaphriang ïa ki jingai jingtip lypa ïa ki Jylla/UT bad ki District, ka Control Room ka peitngor ïa baroh ki kam pynlait im baroh arphew saw kynta.
Ka National Disaster Response Force (NDRF) ka la trei borbah bad ki tnad Sorkar Jylla, ki pulit ka Jylla bad ki SDRF ha baroh kine ki jaka na ka bynta ki kam pynlait im bad ki kam ai jingïarap ban ïada ïa ka jingim jong ki briew. Ka NDRF ka la buh lypa ia ki kynhun jong ka ha ki jaka ba kham don ha ka jingma ban pynsted ïa ka por ai jingïarap. Hapoh ka shi taïew ba la dep, 52 ngut ki riew paidbah la ïoh ban pyllait im da ki kynhun NDRF katba 2206 ngut ki riew paidbah la pynkynriah sha ki jaka kiba kham shngaiñ ha kylleng ki Jylla/UT kiba shah ktah.
Ha ka jingïatreilang bad ka MHA, ka tnad ïada ri (M0D) ka la pyntreikam ruh ïa ki jingdon jingem jong ka ha ka por ba duna tam ban ïada ïa ki briew kiba sahkut, ban ai jingïarap ïa ki Kynhun ai jingïarap ha kaba kit ïa ki briew bad ki tiar bad ban sam ïa ki tiar jingïarap.
Ka jingïalang bishar bniah ha kaba ïadei bad ka jingpynkhreh na ka bynta ki jingshlei um ha shuwa ka aïom slap bad ka jingshit tasam ha kylleng ka ri, la pynïaid da u Myntri Kam Pohïing ka sorkar pdeng u Amit Shah ha ka 10 tarik u Jymmang, 2026. Ha ka jingbuddien, la pynlong sa kawei pat ka jingïalang da ka MHA ha ka 03 tarik u Jylliew, 2026 ban bishar bniah ïa ka jingpynkhreh baroh na ka bynta ka jingjur slap, cloudburst, ki jingshlei um bad ki jingtwa khyndew ha Jammu bad Kashmir. Ka jingpynkhreh ha shilynter ka lynti ïaid Char Dhamyatra ruh la bishar bniah da ka MHA man ka por.
Hapoh ki jingbthah jong u Myntri Kam Pohïing ka sorkar pdeng u Amit Shah, ki kynhun jong ki Myntri Sorkar Pdeng ki la leit jngoh ïa ki jaka ba la shah ktah jong ka Arunachal Pradesh bad Assam naduh ka 07 tarik haduh ka 10 tarik u Naitung 2026, na ka bynta ban peit bniah ïa ka jingjur ka jingjulor bad ban ai jingïarap pisa kaba donkam sha kine ki Jylla na ka NDRF. La pynbeit ba sa kawei pat ka kynhun jong ki Myntri Sorkar Pdeng kan leit jngoh ïa ka thaiñ ba la shah ktah jong ka Assam naduh ka 25.07.2026 na ka bynta ban bishar bniah ïa ka jingduh nong bad jingjulor namar ka jingjur slap bad ka jingshlei um kaba ïaibteng.
Watla ka jingjur slap ba dang shen ka la buh jingeh ïa ki briew ha ki katto katne ki jylla, ka la pynduna ïa ka jingantad ïa ka jingduna ka jinghap slap kaba long kumba 30 percent sha kumba 15 percent.