Bud beit ïa ki kyndon ka NCTE, ong kiba pass MTET

0

Shillong, Risaw 10: Ki Samla kiba la pyndep ïa ka eksam Meghalaya Teacher Eligibility Test (MTET)kiba ym pat ïoh kam hikai ha ki skul sorkar, ki la kyntu ïa ka sorkar ba kan bud beit ïa ki kyndon ba la buh da ka National Council for Teacher Education(NCTE) ha kaba ïadei bad ka jingthungkam nonghikai ha ki skul sorkar.
Ha ka kyrwoh ba la phah da kine ki Samla ba la pyndep ïa ka MTET, ki la pynpaw ba ki kwah ban phah ïa kane ka khubor sha ka sorkar ba nalor ba kadei ban bud beit ïa ki kyndon jong ka NCTE, kadei ban bud pyrkhing ruh ïa ki kyndon aiñ thungkam jong ka sorkar kynthup ruh ïa ka jingpynmih khubor ha kaba ïadei bad ka jingpynbna ban khot pynrung kam hikai ha ki skul sorkar.
Kane ka jingkyntu kiba pass MTET ka long hadien ba u Myntri ka tnad pule puthi, u Bah Lahkmen Rymbui ha ka jingïakynduh bad ki Nonghikai skul Kontrak kiba la pynlong ka jingïakhih ba ka sorkar kan ailad biang ïa ki ba kin ïaleh ïa ka eksam MTET bad kumjuh ruh kan pyrkhat ïa ka rta bad ka mark na ka bynta jong ki.
Na ka liang kine ki samla ki la ong ruh ba kin ïai buddien ïa kane ka jingthmu pynrung kam hikai ka sorkar katba kam pat pynbna ban khot pynrung kam hikai ha ki skul sorkar.

Leave A Reply

Your email address will not be published.