Ka sngi ki Ïingdak ha ka thaiñ NE

0

Shillong, Risaw 10: U Chief Post Master General jong ka North East (NE) Circle u Subrat Das ha ka sngi Nyngkong u ïathuh ba na ka liang ka ophis jong u ryngkat baroh kawei ka tnat Postal ne Ïingdak ha ka thaiñ Shatei Lam Mihngi ka ri ka la pynkhreh ïa kiba bun ki prokram ban rakhe ïa ka ‘World Post Day’ (WPD).
Ha ka jingïakren sha ki lad pathai khuboru Subrat Das u la ïathuh ba ïa ka “World Post Day” la ju rakhe man la u snem naduh ka 9 tarik haduh 13 jong u Risaw ban kynmaw ruh ïa ka sngi ba la sdang ïa ka Universal Postal Union (UPU) ha u 1874 ha Berne Switzerland.
U la ïathuh ruh ba ïa ka WPD la pynba nyngkong eh da ka UPU Congress kaba la long ha Tokyo Japan ha u snem 1969 bad naduh une hi u snem la rakhe kat haduh mynta mynne.
“Ka thong hi jong ka World Post Day ka long ban pynshai pynsngewthuh ïa ki synnïang kiba ka Ïingdak ka la noh sha kam ka jam, ka ïoh ka kot bad ka jingkiew sha khmat jong ka ri” u la ong.
U la ïathuh ruh ba kumba long mynta kiba bun bah ki kam kiba na ka liang ka Post Office ka leh bad ïathuh ruh ba ka North East Postal Circle ki don 15,97,574 tylli ki Post Office Savings Bank (POSB) bad ong ba ka jingailad ban kynshew pisa ha ki Post Office la pynleit jingmut kjyrpang ha ki thaiñ nongkyndong.
U la ong ruh ba kumba long mynta ki don kumba 1,28,416 ki Postal Life Insurance & Rural Postal Live Insurance Policies.
Shuh shuh u la ïathuh ba ha kane ka taiew kyrpang jong ki Ïingdak na ka liang ka ophis kan pynlong ïa ki jingpyshai paidbah bad ka jingpynrung kyrteng Adhar ha ki thaiñ nongkyndong na bynta ban pynsngewthuh ïa ka jingmyntoi ban ïoh kum ka Social Security Pensions, Jan Suraksha Scheme (PMJJY, PMSBY, APY) bad kiwei kiwei de.

Leave A Reply

Your email address will not be published.