Lait im u rangbah bad ka longïing ba ngat bih na u Tit lyngba ki dawai kynbat

Shillong, Risaw 10 : Uwei u rangbah uba kyrteng u Bah Biangbor Marthong ula pynpaw ka jingsngew nguh kaba krhaw ïa u Dr. Boss L.Marthong hadien ba ma u ryngkat kiba haïing kila ïoh koit pat na ka jingshitom kaba jur namar ka jingïoh bam ïa u Tit uba long bih.
Une u rangbah lyngba une u kyrwoh u pynpaw ba ula ïoh bam bakla ïa une u Tit ba long bih ba la wan kheit da i hymmen jong u na khlaw na ka bynta ban shet jyntah.Ula ïathuh ruh ba kila ïa bam lang ïa une u Tit baroh san ngut shi ïing, kata sawngut kiba la heh bad iwei iba dang rit. Hadien ba kila dep ban bam baroh sawngut kiba la heh kila kem pang tyngeh kat haduh ba kila jan ïap namar ka jingwan kynsan ka jingkingkhlieh, jingkem tlot ba jur bad ka jingbyrie ha ki khmat kat haduh ba kila jan ban ym ïohi ei ei shuh, ka jingsuh khriat kynsan bad mih umsyep baroh shi met.
U Bah Biangbor ula ong ruh ba um sngew nang shuh ban leh kumno kumno ruh. Hynrei hadien ba ula kynmaw ïa u Dr. Boss Marthong ha New Nongstoiñ, kumta ruh ula leit sha ka clinic jong u bad rung beit beit kum u nongpang jur (emergency), kata watla ki don shibun kiba ap laiñ shabar.
Ula ong ba ynda u Dr. Boss ula eksamin ïa u, ula ïathuh ba u klongsnam ula tlot bad suki, ka BP kala hiar shibun bad ki pulse ha ki ryndang kti ki tied satang 50 ha ka shi minit, kumta ruh na ka liang u doktor ula thmu ban ym ai dawai shuh ïa u namar la jur palat ka jingtlot.
Hynrei, ula ong ba hadien ba ula ïai kyrpad kumta ruh na ka liang u Dr. Boss ula ai ïa ka dawai bad ong ba un wan biang hadien lai kynta khnang ban eksamin biang ïa u khnang ba lada ka dawai kam treikam hapoh ka laikynta dei ban pynkit beit beit shapoh hospital.
Une u rangbah ula ïathuh ba ula dih ïa kine ki dawai salai bih bad ka dawai Health Fit kaba ula shna hi ban pynkhlaiñ ïa ka jingtreikam u klongsnam bad kawei ka dawai um Vitamin kaba ula shna hi.
Mar ïa dih ïa kane ka dawai une u rangbah ula ong ba hadien shikynta ula ïohsngew ïa ka jingïarap bad ka jingsyaid kala wan biang ha ka met bad ka jingtheh syep kala sangeh bad ula ïoh koit pat na ka bih jong u Tit.
Nalor kata ula ïathuh ruh ba ïa kane ka dawai ula phah dih lang ïa kine kiba haïing kiba la ngat lang ha kane ka jingshitom bad mynta kine ruh kila ïoh pat ïa ka jingkoit.
Shuh shuh na ka liang une u rangbah ula ïathuh ba kane ka jingjia kala jia ha ka 5 tarik mynta u bnai ha ka por ba ula leitkai sha ïing i hymmen jong u iba la leit ban kheit ïa utei u tit.
Kumta ruh kum uwei na ki nongïoh lait im na kane ka jingjia ngat bih da ka jingkmen u kwah ban pyntip lem ïa kane ka khubor sha ki paidbah khnang ba kan long ka jingmyntoi ha kaba ïadei bad ka koit ka khiah.