Nongpoh, Ïaiong 20: Ha kawei ka jingjia aksiden, kawei ka trok umphñiang bad kawei ka Maruti car kila ingkhong khaid hadien ba katei ka trok kit umphñiang kala tynrah ïaka Maruti car haduh ba kan da kylla syndon bad kem ding syndon ha surok Shillong Bye Pass haka shnong Mawpun kshaid ha Ri-Bhoi.
Kane ka jingjia kala jia mynta ka sngi haka por 1 baje eiei, bad katkum ka jingtip bala ioh lum la ïathuh ba katei ka jingjia kala jia naka daw ka jingpynher sted palat jong u nongñiah katei ka trok kit umphñiang kaba la pynlong ïa u nongñiah ba um lah shuh ban tehlakam ïaka kali haduh ba un da leit ban tynrah syndon ïa kawei ka Maruti car bad kylla syndon ha katei ka jaka, bad tang hadien bala kylla katei ka trok kala bthei bad kem ding kynsan naka jingdon ka umphñiang bad pynlong ruh ïa katei ka Maruti car ban kem ding lang ha katei ka jaka.
5 ngut ki ba shong ha katei ka Maruti car kila mynsaw malu mala ba kynthup 4 ngut ki longkmie bad 1 u nongñiah, ha kaba naka liang ki paidbah kiba don ha katei ka jaka kila ïarap mar mar ban rah sha CHC Bhoirymbong ban ioh ïaka jingsumar, ha shuwa ba kan bthei katba u nongñiah bad nongbud jong katei ka trok kila phet krad na katei ka jaka tang hadien ka jingjia bad baroh 2 tylli ki kali kila ingkhong khaid na katei ka jingjia.
Ki pulit ka Umiam tang mar ïa ioh jingtip halor katei ka jingjia kila her her mar sha katei ka jaka ryngkat ki pulit pynlip ding ban tem ïaka jingklang jong ka ding ïa kitei ki 2 tylli ki kali ha surok bah, bad namar ka jingduna ki kali pynlip ding ka ding kala ioh ban bam shngiam ïa kitei ki 2 tylli ki kali haduh ba kin da ingkhong khaid.
