Hiar ki bor District ka WJH bad ki kynhun ban jurip ïa ki bynta ka Wah Myntdu
Ladep ujor sha ka NGT ban pynsangeh ïa ka jingtih shyiap, tih maw bad ban saitjaiñ
Jowai, Ïaïong 20: Shi bynta ban ïada ïa ka jingkhuid jingsuba jong ka Wah Myntdu kaba dei kawei na ki nongbsa umbam umdih ïa ka sor Jowai, na ka liang ki bor District ka West Jaiñtia Hills District ha rynkat ka kynhun Khooid ïa ka Wah Myntdu, ka Synjuk ki Waheh Shnong Jowai, ka Synjuk ki Waheh Shnong Jaiñtia, ka Jaiñtia Fishing and Environment Protection Association (JFEPA), ka Jowai Municipal Board (JMB), ki officer jong ka tnat Urban mynta ka sngi Palei kila leit ban jurip (Joint Inspection) dalade sha ki bynta jong kane ka wah.
Ha kane ka jingleit jurip kitei ki kynhun kiba kila leit jngoh ïa ki nala ne ki nur um kiba la tip kum ki In-Situ Nala kiba la pynshna da ka JMB, kumjuh ruh ïa ki rud jong ka Wah Myntdu.
Ha ka juh ka por la pynban ban pyn sangeh ruh ïa ki nongtih maw tih shyiap, ki nongsait jaiñ, sait kali bad kiwei de ki jingpynjaboh ne pynsniew ïa ka wah Myntdu. Ha ka jingïadei bad kane na ka liang uwei na ki rangbah ka sor Jowai u ma Sajay Laloo u la dep ruh ban ujor ïa kane sha ka NGT.
Katba ha kaba ïadei bad ki nongtih maw tih shyiap bad saitjañ sait kali harih ka wah, na ka liang ka bor District WJHD kala dep ruh ban pynjari da ka kyndon ain 144 Crpc. Ha kaba ïadei bad ki nala kiba la shna ha ki wah duid kiba tuid sha ka wah Myntdu kiba mih na kylleng ki shnong ki dong jong ka nongbah Jowai, ïa kane la lap ba ka jingpyntrei ba ka kam ka dang ïaid beit.
La ïathuh ba ka jingshna ïa kine ki In-Situ Nala ka long ban ïada ïa jinghap ne wan jong ki ñuit ki jaboh sha ka Wah Myntdu, da ka jingdon kine kan ïarap haduh kumba 80% ïa ka jingïoh lad ki ñuit ne ki jakhlia ban hap ne tuid beit beit sha ki bynta ka Wah Myntdu.
Na ka liang ka JFEPA kala dawa ruh ban pynshitom ïa ki nongtih bad nongkit shyiap kit maw kiba ka Association kala mana ha kine ki sngi.
Ha kane jingjurip na ka liang ki bor District la don u ma M.A. Challam, ma D. Pde President JFEPA, ma K.L Pariat Chairman Khooid ïa ka Wah Myntdu, ma Riquoma Rq. Laloo General Secretary Synjuk Waheh Shnong Jowai, ma Alan Niangti President Synjuk Waheh Shnong Jowai, ma Hunbait Pasah officer JMB, ma Bishar Shylla Secretary Synjuk Waheh Shnong Jaiñtia bad kiwei.
U ma Khroo L. Pariat ula ong katkum ka aiñ jong ka NGT baroh kine ki jingtei kiba don hapoh 500 miter na ka wah Myntdu dei ban pynpra shi syndon ïa ki.