Bthah u Deputy CM ïa ki DC ban shim lut ki lad ki lynti ban ïaid beit ka rakhe Republic

0

Shillong, K’Lyngkot 25 : U Symbud Myntri Rangbah ka Jylla, Bah Prestone Tynsong u la ong ba ka sorkar jylla ka la bthah ïa baroh ki bor pynïaid Distrik lane ki Deputy Commissioner ba kin shim lut ki lad ki lynti ban pyntikna ba ka jingrakhe ïa ka Republic Day kan long kaba ïaid beit ïaid ryntih.
Kane ka jingbthah jong u Symbud Myntri Rangbah kadei hadien ka jingïoh kem noh jong ki pulit ïa u Edward Maiong na ka jaka sah ba shipor jong u ha Lower New Colony Laitumkhrah namar ka jingbyrngem ban pynbthei bom bun jaka ha nongbah Shillong.
Haba kren bad ki lad pathai khubor, u Bah Prestone u la ong ruh ba ka jingtohkit ïa utei u rangbah ka dang ïaid shakhmat mynta.
“Ka tnad pulit ka la don ha ka kam mynta ban wad haduh tyllong,” u la ong.
U Bah Prestone u la pyntip ruh ba ka sorkar jylla ka la bthah ruh ïa ki bor distrik bad ïa ki pulit ba kan ym don satia ka jingpynthut ïa ka shongsuk shongsaiñ.
“Ngin pyntikna ba ka shongsuk shongshngaiñ jong ki nongshong shnong ka jylla bad ba khnang ba ka jingrakhe ïa ka Republic Day kan long kaba ïaid beit ïaid ryntih,” u la ong.
Ha kajuh ka por na ka liang ki pulit ki la pynjur bad pynkhlain ïa ki bor pahara ha shwa jong ka Republic Day kata ha kane ka sngi U Blei ka 26tarik Kyllalyngkot.
Na ka liang u SP ka East Khasi Hills u la pyntip ruh ba hadien ba ka la don ka jingbyrngem bthei bom ha Shillong na ka liang ka tnad ka la pynjur ka jingtalasi bad khynra ha baroh ki bynta ba kongsan jong ka nongbah bad ha ka distrik baroh kawei khnang ban khanglad ïa kano kano ka jingthmu ban pynthut ïa ka jingrakhe Republic Day.

Leave A Reply

Your email address will not be published.