2nd Division SCA Cricket League : Jop ka Lawsohtun & Nongpdeng

Shillong, Kyllalyngkot 27: Ka Lawsohtun bad ka Nongpdeng CC ki la khur jingjop ha ki ar tylli ki jingïalehkai ka lympung Shillong Cricket League Second Division 2024/25 ba la pynïaid da ka Shillong Cricket Association ha madan Urkaliar, Shillong.
Ha ka jingïalehkai kaba nyngkong ka Lawsohtun CC ka la pynliem ïa ka Metallica Rising da 8 wiket. Ka toss la jop da ka Lawsohtun kaba la rai ban bol nyngkong.
Haba shimti ban tied nyngkong ka Metallica Rising ka la lah ba kan kamai 129 ron, hap 8 wiket haduh kaba kut jong ka 20 over. Ki nongtied kiba la kamai bun ron ki long u Rahul Barua (36 ron naki 26 bol) bad u Bicky Raj Das (21 naki 16 bol). Napdeng ki rangkawang bol jong ka Lawsohtun kiba la seisoh ki long u Andrew B thabah (4 over: shah tied 23 ron: khur 2 wiket) bad u Greatestfull Lyngkhoi (4 over: shah tied 13 ron: khur 1 wiket).
Haba jubab, ka la donkam tang 17.4 over ïa ka Lawsohtun ba kan kynjoh 133 ron bad hap tang 2 ngut ban jop ïa ka jingïalehkai da 8 wiket. Na ka liang ki nongtied u Chongtre I man u la tied 47 ron naki 30 bol, katba u Kynsai Lyngkhoi u la kamai 56 ron naki 57 bol kaba la biang pura ïa u ban khur ïa ka nam Player of the match.
Haba phai sha ka jingïalehkai kaba ar, ka Nongpdeng ka la jop kput haduh 79 ron ïa ka Jersy king. Ka Jersy King ka la jop ïa ka toss bad jied ban bol nyngkong, ka Nongpdeng ka la lah ba kan buh ïa ka thong haduh 200 ron bad khyllem 5 wiket haduh kaba kut jong ka 20 over ba la mang.
U Maitshaphrang Khongjee u la kamai 50 ron naki 20 bol, nangta u Teiborlang Dhar u la ïarap 36 ron naki 21 bol. Napdeng ki rangkawangbol, u Raj biswa (4 over: shah tied 38 ron: khur 2 wiket) bad u Krishna thapa (4 over: shah tied 26 ron: khur 1 wiket) ki dei kiba la seisoh tam.
Haba jubab ka Jersy King ka la shah khanglad noh da tang 121 ron haduh kaba kut jong ka 20 over ba la mang, bad khyllem 8 wiket. U Sunil Gurung u la kamai 48 ron naki 35 bol, nangta u Gopal Sunar u la tied 36 ron naki 25 bol.
U Donboklang hoojan na ki 4 over shah tied 23 ron bad u Sanki Dhar naki 4 over shah tied 22 ron ki la ïoh ban khur mar 2 wiket kaba la ïarap borbah ïa ka Nongpdeng ban jop da 79 ron. ïa ka nam Player of the match la khur da u Maitshaphrang khongjee uba la kamai 50 ron naki 22 bol.