Bthah u Conrad ïa ki ophisar ban pynsted ïa ka jingkyntiew kyrdan ïa ka Baghmara Civil Hospital

Shillong, Naitung 09: U Myntri Rangbah ka Jylla Conrad K Sangma ha ka sngi Palei ula bthah ïa ki Ophisar ba kin pynsted kloi ïa ka jingkyntiew kyrdan ïa ka Baghmara Civil Hospital, da kaba pynleit jingmut ban pynjanai ïa ka jingai jingsumar ki specialist, ka jingsumar ïa ki Longkmie bad Khynnah, ki tiar sumar ïa kiba mynsaw ha South Garo Hills.
Haba shong bishar ïa ka jingïaid ki kam bad ki Heh ka Tnad ka Koit ka Khiah, u Conrad ula bthah ba baroh ki jingtei kiba dang ïaid bad kiba thmu ban pyntrei, ba dei ban pyndep kham kloi bad ban peit thuh bha ruh ha kaban pynthikna ba kin dep hapoh ka por kaba buh.
Ka jingbishar kam kala pynpaw ba haduh T.11.37 klur la mang na ka bynta ki saw tylli ki jingtei kiba heh, ba kynthup ïa ka jingshna pynbha ïa ka hospital, ka quarter ki nongtrei, ka top um ha tnum bad ka jingtyrwa ban tei pynheh ïa ka hospital sha ka 70 jingthiah.
Ka jingpynbna ïa ka Community Health Centre kaba rim, kaba la pyndonkam mynta kum ka tnad Outpatient, kala dei haduh 85 % ka jingpyntrei, katba ka jingshna ïa ka top um kala dep kumba 70%.
U Myntri Rangbah ula bishar ruh ïa ki jingthmu ban pynkha ïa ka Neonatal Intensive Care (NICU), ka Blood Bank, ka Mother and Child Health (MCH) Wing ba 50 jingthiah, bad ka jingpynheh ïa ka kamra ap ïa kiba kha khun ban nang pynbha shuh shuh ïa ki jingai jingsumar ïa ki Kmie ba ki Khunlung ba dang kha hapoh ka district.
Ban leh eiie halor ki jingduna ki doktor specialist, u Conrad ula bthah ïa ki Ophisar ba kin pynsted noh shaid shaid ïa ka jingthungkam.Ka District Health Society kala dep pynbna ïa ka jinglait ki kam na ka bynta ki doktor Gynaecologist bad Paediatrician, katba ki sienjam ki dang ïaid ban pynkhlain ïa ka jingshakri ki Nurse bad Paramedic.
Ka jingbishar kam ka ïakren ruh halor ka jingtyrwa kyntiew kyrdan ïa ka Chokpot Community Health Centre (CHC) sha ka First Referal Unit, da ka jingbuh ïa ki jaka aijingsumar ba bniah ïa ki longkmie ba kha khun bad ki khunlung, ka Blood Storage Unit, ka Newborn Stabilisation Unit bad ki jingshakri ïa ki nongpang bap hah na shabar.
Ka hospital kala sakhi ïa ka jingnang kiew ka jingdawa naduh ba ka Operation Theatre kala sdang treikam ha u snem 2015.Ka hospital kala dep leh haduh 85 tylli ki surgery, kynthup 42 tylli ki Caesarean section, haba ai jingsumar haduh 20,108 ki nongpang outpatient bad 2,334 ki nongpang ba shah shah hapoh ka hospital ha u snem bala lah.Ha kine ki hynriew bnai jong u 2026, kila don haduh 10,143 ngut ki nongpang outpatient kiba wan shim dawai.
U Conrad ula ban jur ba ka jingpynheh ïa ki jingtei ka dei ban long kiba lah ban shaniah, ka jingai jingsumar kaba bha ïa ki paidbah ka South Garo Hills bad bthah ïa ka tnad ka Koit ka Khiah ba kin bishar man ka por ïa ka jingiaid jong baroh ki project.