Lyngba ka MegLIFE, la pynjyrngam ïa ki jaka buh bad tih dewïong ha ka thaiñ Nangalbibra

Shillong, Naiwieng 13: Ka jaka ba don u dewïong ba shah ktah ha ka bor mariang kaba hab ha South Garo Hills shen kan sa ïoh ïa ka jingkylla ba mar mar lyngba ki lad treikam ba lamkhmat da ka imlang ka sahlang kaba la thmu ban pynïoh biang ïa ka jaka ba itynnad bad ka lad kamai jakpoh.
Ïa kine ki jingtrei shitom, la pynpaw ha ka por ba don ka jingleit ki lad pathai khubor sha kane ka distrik kaba la pynïaid da ka Directorate of Information and Public Relations (DIPR) na ka bynta jong ki nongthoh kot khubor na ka nongbah Shillong.
Ha katei ka jingleit ki lad pathai khubor ka kynhun ka la ïohi ïa ka jingpynïasoh bad pynthymmai ïa ki jaka kiba la julor kiba wan na ka project MegLIFE (Meghalaya Livelihoods and Access to Markets Project) ha ki shnong Dobakol Awemong bad Agrenggitim hapoh Siju C&RD Block, ha kaba la pynkylla thymmai bad pynthymmai ïa ka khyndew kaba la sniew jong kane ka jaka buh ïa u dewïong kaba kynthup lang kaba long 84.77 hektar.
Ka kynhun ka la peit ruh ïa ka kper dieng synsar citronella ha Nangalbibra, kaba dei kaba la thaw ban pynroi ïa ka jingpynkhuid ka khyndew bad pynlong jingmyntoi na ka bynta jong ki briew ha katei ka district.
Na ka jingheh jong ka jaka ba la pynkhuid bad pynitynnad biang, 70.83 hektar la pyndap hapoh ka Assisted Natural Regeneration (ANR), kaba kynthup ïa ka jingthung ïa ki 400 tylli ki tynrai dieng rit ha man la kawei ka hektar ban pynshlur ïa ka jingmih bad jingheh jong ki jingthung bad ban pynbiang pat ïa ka jaka ba la julor.
Sa 13.94 hektar pat la pynwandur hapoh ka jingrep ïa ki phlang ba iwbih, khamtam eh u citronella bad u phlang shier, da kaba pynïasohlang ïa ka jingpynbha ïa ka mariang ryngkat bad ki lad kamai jakpoh na ka bynta ki paidbah ba shong basah ha kitei ki thaiñ.
Kawei na kiba kongsan jong kane ka jingthmu ka dei ka jingthung ïa u citronella ha ka shnong Agrenggitim, kaba la sdang ha u 2023 ha kaba la thung kumba 7 lak tylli ki phlang citronella ha kylleng ka jaka ba don 13.94 hektar. La thung ïa une u phlang citronella da ka jingïashim bynta jong ki kynthei kane ka thaiñ kiba na kane ka shnong.
Ki jingpyrshang ha Dobakol Awemong, Agrenggitim bad Nangalbibra ki pyni kumno ka jingïashim bynta lang jong ki paidbah, khamtam ka jingïadon bynta jong ki kynthei, ka ïarap ban pynkylla ïa ki jaka ba la shah ktah na ka jingtih dewïong sha ki jaka ba don jingmyntoi, ha kajuh ka por ban kyntiew ïa ka jingpynbha pat ïa ka mariang bad ban ai ki lad kamai jakpoh ba neh slem.