50 akar ka jaka yn ai ka sorkar jylla ïa ka St. Xavier’s University ha Mawkhanu

Shillong, Naitung 09 : Ka Sorkar Jylla ka la mynjur ban ai 50 akar ka jaka sorkar ha Mawkhanu sha ka St. Xavier’s University ban seng ïa ka campus jong ka hajan Shillong.
Haba pyntip ïa kane hadien ka jingïalang jong ka kynhun Myntri ha ka sngi Balang, u Myntri Rangbah ka jylla, u Conrad K. Sangma, u la ong ba kane ka rai ka wan hadien bun snem ki jingïakren bad jingïasyllok naduh ba ka jylla ka la mynjur ïa ka aiñ ban seng ïa kane ka University.
U Conrad u la ïathuh ba ki bor pynïaid jong ka St. Xavier’s University ki la kyrpad ïa ka sorkar jylla ban ai 100 akar ka khyndew na ka bynta kane ka projek.
“Ha kine ki snem ba la leit, la don bun ki jingïakren bad jingïasyllok bad ki bor pynïaid jong ka University. Hadien kata, ki la phah shithi sha ka sorkar ban pan 100 akar ka khyndew ban seng ïa ka University,” u la ong.
U la ong ba hadien ka jingïakren kaba bnïah, ka Kynhun Myntri ka la rai ban ai 50 akar ka khyndew ha Mawkhanu ha ka dor kaba duna tam, kata kumba 1 lak tyngk ashi hectare.
“Kane ka long ka dor jingïarap na ka bynta ka St. Xavier’s namar ba ka dei ka jaka pule kaba pawnam bha. Ngi peit ïa kane kum ka jingbei tyngka na ka bynta ka lawei jong ki samla bad ki pateng ban wan,” la ong u Myntri Rangbah.
U Myntri Rangbah u la ong ba ka jingwan jong ka St. Xavier’s University, kaba dei ka jaka pule kaba la pawnam ha India bad ha kiwei pat ki ri ruh, kan kyntiew ïa ka pule puthi ha ki kyrdan ba shalor, khamtam ha ka higher bad technical education.
“Ngi ngeit skhem ba ka jingïoh ïa kum kane ka University kan plie bun ki lad pule, ki lad ïohkam bad kiwei kiwei ki kabu thymmai ïa ki samla jong ka jylla bad ka thaiñ Shatei Lam Mihngi hi baroh kawei,” u la ong.
U Myntri Rangbah u la bynrap ba kane ka rai ka ïahap bad ka thong jong ka sorkar jylla ban kyntiew ïa ka pule puthi bad ban wanrah ïa ki jaka pule kiba don ka kyrdan kaba bha, khnang ba ki samla Meghalaya kin ïoh ki kabu kiba kham bha hapoh la ka jong ka jylla.