Bteng ka UDP Nongstoiñ ban pan jingkyrshan ha ki jaka kham kyndong

Nongstoiñ, K’lyngkot 31: Katba nangmih ki sngi ka United Democratic Party Nongstoiñ constituency, ka la nang tur sha ki kyndong kynshrot bad ki la don bun ruh ki jaka kiba ka jingwan pynïasoh jong ki paitbah ka la nang kiew, ban ai jingkyrshan ïa u kyrtong jong ka party shwa ka elekshon ban long ha ka 27 tarik, Rymphang.
Ha ka sngi hat majai ka 31 tarik Kyllalyngkot 2023, ka party ka la pynlong jingïalang paitbah sa ha ka shnong Mawlangkhar. Ha katei ka jingïalang ki spah ngut ki nongkyrshan jong kiwei pat ki party, ki la wan ha katei ka jingïalang na ka bynta ban ai ka jingyrshan ba pura ïa u bah Polestar Nongsiej u kyrtong jong ka UDP na Nongstoiñ.
Ha katei ka jingïalang paitbah, u bah P.Lyngkhoi na na ka shnong Umsaw u nongïalam ba radbah jong ka NPP, nangta na u bah R.S.Kharbani na Khyllem-tiehsaw u ba dei ruh u general secretary jong ka UDP Nongstoiñ circle, u bah Sahitbor Diengngan, u bah D.Parïong u pulit ophisar ba la shongthiat, u bah L.G.Nongsiej MDC barim ka Nongstoiñ, u bah Brolding Nongsiej MLA ka Mawthadraishan bad u bah Polestar Nongsiej u kyrtong ka UDP na Nongstoiñ, ki la don ryngkat ban ai jingkren pynshai halor ki nongrim jong ka party.
U bah Brolding Nongsiej haba kren ha katei ka jingïalang, u la ther tyngeh ïa kane ka sorkar ba la ïalam da ka NPP, da kaba ong ba watla ki MLA ka UDP bad kiwei ki party riewlum ki ïadonlang ha ka sorkar MDA. Hynrei ka bor ba hakhlieh duh ka shong ha u Myntri Rangbah. Nalorkata u Myntri Rangbah ba mynta u Conrad Sangma namar ba u don ka bor ïa ki skhim sorkar kiba da ki hajar klur, u la rah lut sha Garo hills katba ha Khasi bad Jaiñtia pat tang da ki phew klur ki ïoh.
Nalor kata u bah Nongsiej u la ther tyngeh ïa ka jingkular jong u bah Macmillan Byrsat MLA jong ka NPP na Nongstoiñ, da kaba ong ba ha u 2018 hadien ba u la jop ïa ka elekshon, u la khot ïa baroh ki nongkhaïi dewïong ha Nongstoiñ ban pynkup burom bad ban ai da ki momento. Hynrei, ka jingpynkup burom jong u ka long thik kumba shu pynkup shah, hynrei haduh mynta um shym la lah ban leh ei ei. U la kyntu ïa baroh ki nongkhaïi dewïong ba lada ki dang sngew dei ban jied bad pynjop ïa u, kin sngewthuh hi namar ym don ba lah ban khang ïa ka mon laitluid jong uwei pa uwei.
U bah Nongsiej u la ong ruh ba lada ki paitbah ka jylla kin dang ailad ba ka NPP kan synshar sa shisien ha kane ka kynti, shano ka jaitbynriew kan poi namar mynshuwa ki ju ong ba ki Garo ki dei ki muid. Hynrei ki paitbah Khasi jaiñia ha kine ki sanphew snem ki kylla long pynban ki dieng sawdong kiba shah tan ha ki muid.
Ha kaba ïadei bad ka jingphah ïa ki shnong kiba hap hapoh ka Mawthadraishan Block sha Nongstoiñ, u la ong ba lada u kyrtong ka UDP na Nongstoiñ un jop, kam don jingeh ban pynphai biang ïa kitei ki shnong sha Mawthadraishan bad wat ban thaw sa kawei pat ka Block ruh kam don jingeh. Namar, lada ka Rambrai Constituency ka ïoh ar tylli ki Block, kan eh aïu ba ka Mawthadraishan ruh kan don ar tylli ki Block bad lada ka UDP kan ïoh ban ïalam ïa ka sorkar, ym don jingartatien ei ei ba ïa ka jingangnud ki paitbah yn pynurlong.
Nalor kata u la ong ba lada phai ha ka jingeh ba ki paitbah ka thaiñ Marngor ki ïakynduh, ka dei hadien ba ka Mawthadraishan Block ka la hap noh ha ka Eastern West Khasi Hills ïa ki shnong ka thaiñ Marngor la phah noh sha ka Nongstoiñ Block, kaba la ktah haduh katta katta namar ka Nongstoiñ Block ka jngai kumba 21 kilomitar na Nongkasen, katba ka Mawthadraishan Block pat ka jngai tang 3 kilomitar na Nongkasen na ka lad ban leit sha Marngor.
Halor katei ka jingeh jong ki paitbah, u bah Nongsiej u la pynshai ha ki paitbah ba u la dep ïakren bad u bah Metbah Lyngdoh MLA ka Mairang u ba dei ruh u Lamphang ha ka ïing Dorbah Thawaiñ ka jylla, ha kaba u la kular ba hadien ka elekshon lada ka party ka don ha ka sorkar, un sa ïaleh katba lah ban pynphai biang ïa kitei ki shnong sha Mawthad-raishan Block. Hadien ba la wai ka jingïalang khlem poi pyrkhat puk la mih ki paitbah ha madan ha kaba ki la ïa shad ïa risa haduh ba ka madan ka la tdem hi puk.