Nga angnud ban kyntiew ïa ka pule puthi bad kam ïalehkai: Polestar Nongsiej

0

Nongstoiñ, K’lyngkot 31: U bah Polestar Nongsiej haba ai jingkren ha ka sngi palei ha ka jingialang paidbah ha Mawlangkhat, u la ong u angnud eh ban leh lada ki paitbah kin pynjop ïa u, ka long ban kyntiew ïa ka pule puthi ha poh ka Constituency bad ha ka jylla baroh kawei.
U la ong ruh ba haba u leit kylleng kylleng ki shnong hapoh ka Constituency, u dap da ka jingsngewkhia ban ïohi ba ki don ki skul kiba ha ka por lyiur ki khynnah ki hap ban shong shah slap namar ba ki tin sop ki la pei lut hynrei ym don ba ïarap.
Nalorkata, u la ong ba u la lap ruh ba ki don ki shnong hapoh ka constituency kiba wat tang ka skul ruh kim pat don. Lada ka long kumne ka shem jingeh haduh katta katta ïa ki kmie ki kpa ban phah skul ïa ki khun kiba dang rit, namar ki hap ban leit sha ki shnong kiba jngai bha.
U bah Nongsiej u la ong ruh ba kawei pat ka jingangnud jong u ka long ban kyntiew ïa ki samla ha ki kam ïalehkai sport, khamtam eh ha ka phutbol namar haba u leit kylleng ki shnong ki samla bad ki nongïalam jong ki Club bapher bapher, ki ju wan ïakynduh ïa u bad ki ud ki nam ba ki kwah ban kyntiew ïa ki kam sport hynrei kim don lad. Kumta lada ki paitbah ki ai ka jingkyrshan ban pynjop ïa u, un ïaleh katba lah ban pynsngew sha ka sorkar ba kan thaw da ki policy ba kyrpang na ka bynta ban kyntiew ïa ki samla ha ka jingïalehkai sport.
Ha kajuh ka por u la ong ruh ba u don ka jingangnud ban wanrah da ka policy kaba biang na ka bynta ban ai kam ai jam ïa ki samla khlem da khmih lynti tang ïa ki kam sorkar. Hynrei, ba kin seng da ki kam la jong bad ban ïeng hala ki kjat na ka bynta ban kyntiew ïa ka ïoh ka kot bad ka kamai kajih.

Leave A Reply

Your email address will not be published.