Nongstoiñ, Naiwieng, 9: Wat haba ka seng All India Trinamol Congress kam pat pynbna la ïano yn ai tiket na ka bynta ban pynïeng kum u ne ka kyrtong na ka Rambrai Jyrngam konstitwensi ban ïakhun ïa ka election ka ban wan jong u snem 2023. Hynrei, ka la don pat ka jingïaknieh tiket kaba narieh narieh hapdeng ka kong Aicifull K Musulman kaba dei na ka thaiñ Nongstoiñ bad u bah Fernandez Dkhar u ba dei ruh u President Megha-laya Pradesh Trinamool Youth Congress.
Ïa kane la ïoh jingtip lyngba ki katto katne ngut ki nongkitkam kiba kham hakhmat jong katei ka seng kiba na ka West Khasi Hills District, kiba la kam ba ki bor ki ba halor jong ka All India Trinamol Congress Meghalaya, ki la bthah ïa u bah Fernandez Dkhar ba un nang sdang trei noh ïa la ka kam ban rung sha ki shnong ki thaw na ka bynta ban ïalap ïa ka kam election.
Hynrei, katba ka kong Aicifull pat khlem ka jingtip jong ka seng ka la shu ïaid lait bad naduh kine ki bnai kiba la dep ka la sdang ban tur shait shi shait sha man la ki shnong ki thaw jong katei ka konstitwensi. La kynnoh ba ka la tur ban trei ïa ka kam khamtam eh sha ki thaiñ nongkyndong, ki shnong kiba sah da ki paralok Garo kaba kynthup ïa ka thaiñ Malangkona, Mawïamsyiem, Kyrchai, Kamphaduli, Athiabari bad kiwei kiwei kiba dei ki shnong khappud bad ka jylla Assam.
U nongthoh khubor haba la kylli ïa ka kong Aicifull ka la ong, “Nga la ïoh ïa ka jingbthah na u Dr.Mukul Sangma ba u la ong ïa nga ban sdang trei noh ïa la ka kam. Kumta nga la sdang man la ka sngi hynrei haba ïadei pat bad u bah Fernandez ngam don jingtip ei ei. Tangba lada ngam ïoh tiket ngan sa peit pat ha kata ka sngi ha ka por pynbna ïa ka tiket”, ong ka kong Aicifull.
