Ïashim bynta ki khynnah skul bad nonghikai ha ka jingïaid paidbah ki longkmie ha Jowai
Jowai, Naiwieng 09 : Mynta ka sngi ka ophis District Library, Jowai Art & Cultural Department ryngkat ka jingïatrei lang bad ka Raja Ram Mohan Roy Library Foundation lyngba ka jingkyrshan na ka Ministry of Culture, Government of India kila pynlong ïa ka jingïaid paidbah ha nongbah Jowai kaba long shi bynta ka jingrakhe ïa ka lyngkhuh sngi kha ba 250 jong u Raja Ram Mohan Roy.
Ha kane ka jingïaid paidbah jong ki longkmie kaba long shibynta na ka jingpynsngewthuh paidbah halor ka jingdonkam jong ka jingpynkup bor ïa ki kynthei la wan ban ïashim bynta lang da ki nonghikai bad ki khynnah skul na ki skul bapher bapher kiba don hapoh ka West Jaiñtia Hills District.
Ïa kane ka jingïaid Rally la sdang na ophis treikam jong ka District Library Jowai ha kaba u Deputy Commissioner ka West Jaiñtia Hills District u bah B.S. Sohliya, IAS u long u kongsan bad kaweh ruh ïa ka lama.Haba ai jingkren ha ka jingïalang kaba lyngkot u bah Sohliya u la ong ba wat la ïa ki kynthei la pynïaryngkat kyrdan bad u shynrang, hynrei bun sien hi ki longkmie bad khynnah kynthei ki dang shah iehbeiñ ha kiba bun ki liang, khamtam kum ha ka liang ka pule puthi, ka jingshah lehbeiñ jong ki ha ki rukom bapher bapher, kumta ula kyntu ïa baroh da kaba ong ai ba kane ka jingpynkup bor ïa ki kynthei kan long kaba treikam shisha ha ka imlang ka sahlang.
U la kyntu ruh ïa ki khynnah skul ïengskhem halor kane ka hok jong ki kynthei bad ruh ban ai jingtip sha ki bor District lane ki bor pynïaid shnong lada ki lap ïa kino kino ki jingleh pyrshah ïa ki kynthei khynnah.
La ïoh ruh ka jingkren na u bah Terence Sawian uba dei u Chairman jong kane ka prokram, uba la batai lyngkot halor ka jingnoh synniang jong u Raja Ram Mohan Roy halor ka jingpynkup bor ïa ki kynthei. U la ong ruh ba u Raja Ram Mohan Roy u ïaleh pyrshah bha ïa ka jingpynmlien ïa ka jingshong kurim khynnah, ka jingshong kurim bun ngut bad ka jingpynmlien ïa ka Sati ne ka jingthangim ïa ki kynthei ïaplok.
Ïa ki kyntien ai khublei la ai da u ma W. Gassah, District Librarian, Jowai.