Pyllait ka WJSU ïa ka Lucky Draw na ka bynta ka 3rd War Jaiñtia Scholarship Examination 2026

Amlarem, Risaw 04: Kum shi bynta ban pynmih fund na ka bynta ka 3rd War Jaiñtia Scholarship Examination 2026, la pyllait paidbah ïa ka Lucky Draw ka seng da u kongsan bah Jersom Shylla, President Rangbah ka Jaiñtia Students’ Union (JSU), Jowai.
La pynïaid ïa ka programme da u Vice President ka seng Bah Banthom Sumer, la don lang u Education Secretary Bah Heartcasing Dkhar, u General Secretary Bah Stalwoss Pohkyrnu ryngkat ki dkhot jong ka CEC.
U President Rangbah ka JSU Central Body u Bah Jersom Shylla haba ai jingkren haka jingplie pyrda u la kyntu ïa ki paidbah ka thaiñ War Jaiñtia bad ka jylla hi baroh kawei ban kyrshan radbah ïa ka sienjam ba ka seng ka shim na ka bynta ban kyntiew ïa ka pule puthi bad ban kyrshan ïa kiba duna ka ïoh ka kot kiba duk bad rangli hapoh ka thaiñ da kaba kyrshan da kaba thied ïa ki ticket kane ka Lucky Draw ba shong dor Rs 30/- shi ticket kum ka dak ka jingai mynsiem shuh shuh ïa ki kam ba bha ba ka seng ka leh na ka bynta ka thaiñ WarJaiñtia.
Ula kyntu shuh shuh kum ki sengbhalang kiba trei mon sngewbha ba kin don ka mynsiem ka jingïatylli khnang ba ngin lah ban jop shibun ki kam jong ka imlang sahlang.
Lyngba kane lucky draws ka seng kan pynmih fund haba ïadei bad ka 3rd WarJaiñtia Scholarship Competitive Examination 2026 ka ban sa long ha u bnai December 2026.
U Symbud Kongsan ha kane ka sngi u long u President ka Jaintia National Council (JNC), Western Zone, Jowai. Ula pynpaw ka mynsiem kaba sngewkmen haduh katta katta haba u ïohi ki kam ba ka seng WJSU ka shim khia haba ïadei bad kane ka Scholarship kaba long ka nuksa kaba bha tam. Ula kyntu ruh ïa ki paidbah ba kin ïa snohkti lang da kaba thied ïa ka Lucky Draw khnang ba ka jingthmu ba bha jong ka seng kin long kiba jop bad seisoh.
La ïoh ruh ka jingkren lyngkot na u President Rangbah ka War Jaiñtia Students’ Union Bah Everest Langstang. Uba la ai khublei kyrpang ïa ki paidbah ka War Jaiñtia bad ka Hynñiewtrep baroh kawei halor ka jingkyrshan na ka por sha ka por haba ïadei bad kane ka Lucky Draw na ka bynta ban pynmih fund ban kyrshan ïa ki khynnah skul kiba wan sha khmat lynba kane ka Scholarship.
Shuh shuh u ong ba kim juh iehnoh ïa ka seng naduh ba sdang ka 1st War Jaiñtia Scholarship Competitive Examination 2024 haduh ka 2nd WarJaiñtia Scholarship Competitive Examination 2025. Ka jingkyrshan ki paidbah ka long kaba pynlong ïa ka seng ban jop ïa kane ka Scholarship. Pynkut ka kyrwoh na u Publicity Secretary ka seng, Bah Gabriel Shylla.
Ki Prize jong kane ka Lucky Draw ki long kumne 1st Prize – Rs 1,00,000/-, 2nd Prize – Rs 50,000/-, 3rd Prize – Rs 30,000/-, 4th Prize – Rs 10,000/-, 5th Prize – Rs 5,000/- lem bad 5 tylli ki Consolation Prize – Rs 3,000/- kawei.