Knieh ki Pulit ïa ki Plakad ba pynthud ka HYC ïa ka jingleit u CM ha Rambrai

0

Nongstoiñ, Naiwieng, 09: Ka Hynnniewtrep Youths’ Council (HYC) West Khasi Hills District bad ka Rambrai Unit ha ka sngi Balang hapoh ka jingïalam jong u Assistant Organising Secretary u Samla Olivertwis Marngar bad u General Secretary ka HYC Rambrai Circle u Samla Bankit Marwein ki la tur kynsan da kaba rah placad ban dawa ïa ki 9 tylli mat jong ka Save Hynnniewtrep Mission (SHM) hakhmat jong u Myntri Rangbah ka Jylla u Conrad Sangma ha ka jingleit iuhkjat jong u ha ka shnong Rambrai ban buh mawnongrim ha ka jingpynbna ba la plie ïa ka C&RD Block jong ka Rambrai.
Ki Pulit kiba ap pahara ha lynri, ki la pakhang lynti bad ki la knieh ruh ïa ki placad na ki dkhot ka HYC hynrei watla katta ki dkhot ka seng kim shym la kynran dien bad shiphang ka la mih ka jingïapynibor hapdeng kine ki arliang mamla.
Ha kum kane ka khyllipmat, ki dkhot ka seng khlem da pyndem ki la ïohlad ban pyrta shla hakhmat u Conrad Sangma katba u dang ïaid na lynti ban leit sha ka jingïalang ban plie ïa ka C&RD Block Rambrai.
Hadien kane na ka liang u Olivertwis Marngar u la ong ba ka seng kam pyrshah ïa ka jingwan plie ïa ka Block kaba dei ka jingmyntoi ïa ki paidbah hynrei ka seng ka buh ka jingkylli ïa u Conrad Sangma u la leh aiu ha kaba ïa dei ka Inner Line Permit(ILP), ka jingpynkynriah ïa ki briew kiba sah ha them Iew Mawlong, ka jing pynrung ïa ka ktien Khasi bad Garo ha ka Kjyrnit Baphra jong ka riti synshar ka Ri India, ka jingïasoi ïa ka Memorandum of Understanding (MoU) pynbeit pud bad ka Assam, ka jingweng noh ïa ka Meghalaya Regulation of Gaming Act, 2021, ka jingamsap, ka jingshah pynïap jong u Bah Cheristerfield Thangkhiew.

Leave A Reply

Your email address will not be published.