Mawkyrwat, ‘Nailar 14: Ka Khasi Students’ Union (KSU) jong ka Ranikor Circle mynta ka 14 tarik u ‘Nailar, 2024 ha ki por kumba 1 baje ei ei nohphai sngi ki la ïoh ban bat ïa shikynhun ki bym dei khasi ha Ranikor bad kiba dang wan kiew na ka thaiñ khappud kaba na ka shnong Maheshkhola, South West Khasi Hills District kaba dei ka shnong ba ha khappud jongka Ri Bangladesh.
Ha ka kyrwoh , u bah Forwardman Nongrem, President jong ka KSU South West Khasi Hills District la ong ba ka KSU ka la bat ïa kine ki briew kiba wan kiew na ki thaiñ khappud jong ka Ri Bangladesh da ka jingsuba ba ki dei ki nong Bangladesh kiba wan rung tuh kum ki nongbylla, bad hadien ba la lap ba kim don ïa ki kot ki sla kiba biang la aiti noh sha ki pulit jong ka Ranikor Police Station ba kin leh ïa kaba donkam.
Ha kawei pat ka bynta, ka KSU ka kwah ban kyntu ruh ïa ki shipai ïada khappud ki Border Security Forces (BSF), ïa ka Police Department bad ruh ïa ka District Administration jong ka South West Khasi Hills District ba ki dei ban shimkhia halor kane ka kam jong ka jingnang wan kiew ki briew bym dei ki trai ri trai muluk khamtam na ki thaiñ khappud.
Ka KSU ka maham ruh ïa ki kontraktor bad ki nongaikam ba da lei lei kim dei satia ban pyrkhat tang ïa ka ïohnong shimet jong ki da kaba khot ïa ki khar Bangladeshi ban wan trei ne ban wan bylla hynrei ki dei ban husiar ïoh kan mih kaei kaei ka jingeh hadien ha bud. Shuh shuh ka KSU ka maham ba lada don kino kino kiba ïarap ïa ki bym dei trai ri trai muluk ban wan rung kum ki nongbylla na ka liang ka seng kan nym ap hynrei kan sa leh ïa kaba donkam.
Khadduh eh ha ka kyrwoh na u President ka KSU, South West Khasi Hills District, u bah Forwardman Nongrem ula ong ba ka seng nangne shakhmat kan nang ïai peitngor da kaba kan pyni da ka kam ban ïada ïa ka thaiñ khappud bad lada ki bor District, ki bor pulit bad ki shipai ïada khappud kim shimkhia ne kim lah ban leh ei ei halor kane ka mat bad ka seng ruh kan leh ïa kaba donkam bad kan shim hi ïa la ka bynta.
