Baroh la pynkhreh ban sdang noh ïa ka jaka pule doktor, ka Shillong Medical College : Health Minister

Shillong, Lber 03 : Ka Myntri ka tnad ka Koit ka Khiah ka Jylla, Dr. M Ampareen Lyngdoh ha ka sngi Nyngkong ka la ong ba baroh ki jingpynkhreh ki la ïaid shakhmat na ka bynta ban sdang noh ïa ka jingpule doktor kaba nyngkong mynta u snem ha ka Shillong Medical College bad ïa kane ki ap mynta sa ïa ka jingmynjur na ka National Medical Commission (NMC).

Haba jubab halor ka jingkylli ba wanrah da u Nongïalam ka Liang Pyrshah ha Ïing Dorbar Thawain ka Jylla, Dr. Mukul Sangma, ka Myntri ka la pyntip ruh ba kane ka Shillong Medical College kan ïarap ym tang ha ka lain pule doktor hynrei khamtam ruh ban ai ka jingshakri kaba kham paka ïa ki paidbah ka jylla.

“Baroh ki kam ki la ïaid shakhmat ban sdang noh ïa ka kynhun pule doktor kaba nyngkong mynta u snem hadien ba la ïoh jingmynjur na ka NMC,” ong ka Myntri.

  Shwa kane, na ka liang u Nongïalam ka Liang Pyrshah u la ong ba u sngewkhia namar kam don jingshai satia haba ïadei bad ka jinglong jingman jong kane ka projek watla ka thong jong ka sorkar ka long ban sdang noh ïa ka jingpule doktor naduh mynta u snem.

Hynrei haba jubab halor kane, ka Myntri ka la ong ba ka tnad ka la ïaid ïa ka kam ban pyntreikam noh ïa ka Shillong Medical College bad pyntip ruh ba ki la dep ban pynïasoh bad ka North Eastern Hill University.

Nangta ka la pyntip ruh ba ïa ka Pasteur Hills la dep ba pynkylla sha ka Academic Block.