Mang ka sorkar haduh 7 tylli ki Outpost ban ai jingïada ïa kiba sah ha khappud, ong u Bah Prestone

Shillong, Lber 03: U Symbud Myntri Rangbah ba khmih ïa ka kam Pohïing u Bah Prestone Tynsong ha ka sngi nyngkong u la pyntip ba ka Sorkar ka la pyrshang bun ki lad ban pynbeit ïa ka kam ïakajia pud haba pynïadon bynta lang ïa ki nongïalam shnong.
Halor kane haba jubab ïa ka call attention motion hapoh ka Ïingdorbar Thaw aiñ, u Bah Prestone ula ong ba ka Sorkar ka la mang haduh 7 tylli ki border outpost kiba kynthup ïa ka Rani-Jirang BOP ha Ri Bhoi district, Langpih BOP, Lejadubi BOP, bad Umwali BOP ha West Khasi Hills district, Mooriap BOP ha East Jaiñtia Hills, Tihwieh BOP bad Mukroh BOP ha West Jaiñtia Hills, ban pynbeit bad peitngor ïa ki kam ïakajia ha khappud bad kumjuh ruh ban ai ka jingïada ïa kiba sah ha khappud.
U la ong ba nalor kane, ka Sorkar ka la mang ruh haduh 9 tylli ki Police outpost ba thymmai ha Jylla bad kine ki kynthup ïa ka Mawkynrew OP bad Mawjrong OP ha East Khasi Hills, Kyrshai OP, Athiabari OP bad Malangkona OP ha West Khasi Hills, Barato OP ha West Jaiñtia Hills, Umpleng OP ha East Jaiñtia Hills, Rongsak OP bad Bawegre OP ha East Garo Hills.
“Ka Sorkar ka la kut jingmut hok ban ai jingïada ïa ka hok bad ka jingshngaiñ jong ki paidbah ha khappud bad yn dang bteng ban shim ïa ki sienkam ha ka ban leh eiei halor ki jingeh ba ki mad,” ula ong.
Halor ka rai jong ka Mukroh ban boycott ïa ka elekshon KHADC ba dang shu dep, u Bah Prestone ula ong ba ki bor district ka West Jaiñtia Hills kynthup ki Tnad sorkar ki la trei khlem shongthait ban pynthikna ïa ka jingshong suk shongshngaiñ ha ka thaiñ. Ka jingtuklar jong ki ha ka por kaba dei ha kiba bun ki jingïakynad khlem pep ka la khanglad ïa ka jingpur jong kitei ki jingjia.
Shuh shuh halor kane u la ong ba namar kine ki jingpyrshang, ki paidbah ka Mukroh kila pynkylla ïa ka rai bad mynjur ban ïashimbynta ha ka elekshon, ula ong haba bynrap ba ki jingïalang ïalap elekshon ruh ki la ïaid beit ïaid ryntih bad ïa ka jinglong jingman la peit pyrman bha ban pynthikna ba kan neh ka shongsuk shongshngaiñ ha ka thaiñ.
Ha kaba iadei bad kane u la pyntip ba ka elekshon KHADC kaba la long ha ka 21 tarik Rymphang ka la sakhi ïa ka jingpoi thep vote ki paidbah ha Barator-Mukroh sha ka 84.63%.
“Kane ka jingkheiñ ka la kren jam ïa ka jingpyrshang ba la shim ban pynthikna ba ki nongshong shnong ba sah ha khappud ki ïoh ban thep vote,” ula ong.