Ban tip kumno ban ïada lada jia jingkhynñiuh jumai pynlong da ki mock drill ha man la ki District
Shillong, Lber 18: Ka Meghalaya State Disaster Management Authority (MSDMA), lem bad bad ka National Disaster Management Authority (NDMA), kila pynlong ïa ka State-Level Mock Exercise halor ka jingpynjulor u jumai ha State Convention Centre, Shillong.
Kane ka State-Level Mock Exercise ka long kum shi bynta ban ai jingtip bad pynsngewthuh ïa ki paidbah ba kumno kin leh ban ïada ïalade bad ban long kiba la pynkhreh ban lait na ki jingjia ba sngewsih lada jia ba wan ka jingkhynñiuh jumai ha ka jylla.
Kane ka jingïalang ka la ailad ïa ki heh ophisar ban pyni nuksa bad ban kren halor ki buit ban ïada lada wan kum kine ki jingjia ban lait na ka jingjia ba sngewsih.
Ha kane ka jingïalang la pyni online ruh ïa ka drill na ki 11 District ka Jylla bad ruh kaba pyni ïa ka jingpynkhreh jong ki hala ki jong ki District. Ha kane ka jingïalang la wan ïashim bynta da ki heh na ki tnad bapher bapher, kaba pyni ïa ka jingïatreilang ha ka jingpynkhreh bad jingïatreilang na ka bynta ban ïada ban lait na kino kino ki jingjia ba sngewsih.
U Sanjay Goyal u Commissioner & Secretary, Revenue & Disaster Management Department haba kren haka jingïalang u la pynpaw ïa ka jingkyrmen ba lyngba kane kan ai ïa ki jingai jingmut bad jingshemphang kiba kordor ban kyntiew ïa ka jinglah jong ka jylla ban ïakhun pyrshah ïa ki jingjia ba sngewsih .
Shuh shuh u Goyal u la ban jur ba kane ka dei ka por kaba biang tam ban bishar bniah biang ïa ki jingtei, ban pynthikna ba la pyndonkam pura ïa ki, bad ban pynbha ïa ka jingïatreilang jong ki ban ïarap lada jia ka jingjia ba sngewsih.
U Lt. Gen. Syed Ata Hasnain (Retd.), uba dei u dkhot ka NDMA, New Delhi, u la kyntu ïa ki heh sorkar ban bishar bniah ïa ki mat kaba don 10 tylli kiba don ha ka website jong ka NDMA bad u la ban jur ruh ïa ka jingdonkam jong ka jingsngewthuh ba tbit ha ka jingpynïaid ïa ki jingjia ba sngewsih.
Ka kong M. War Nongbri kaba dei ka Commissioner & Secretary, Revenue & Disaster Management Department kaba dei ruh u Executive Director ka MSDMA, kala plie ïa jingkren pdiang bad kaba la ban jur ïa ka jingdonkam ban pynkhreh ïa ki jingjia ba sngewsih ha ka jylla