Nongpoh, Lber 18: Ban ïada bad tehlakam ïaka jingthang dusmon ïaki khlaw ki btap, khamtam ki jingthaw ba im hapoh ka mei mariang, u District Magistrate ka Ri-Bhoi District u la maham da kaba tyngeh ïaki briew kiba thang dusmon bad pynjari syndon da ka kyndon aiñ 163 BNSS 2023 ha baroh kawei ka Ri-Bhoi District pyrshah ïa kiba leh pyrshah khamtam ha kum ka por tyrkhong ba jur bha ka jingthang khlaw kaba buh jingma bad lah ban wanrah ïaki jingjia ba sngewsih.
U Abhilash Baranwal District Magistrate ka Ri-Bhoi District u la kyrpad ïaki nongïalam shnong ban ai ka jingtreilang bad ban ujor sha ki pulit lada don ki briew kiba thang khlem akor ïaki khlaw ki btap namar kane ka wanrah ïaka jingïap jong ki mrad ki mreng, ka jingpynmih ïaka lyer jaboh, jingkylla jong ka mariang bad khamtam ki jingjia ba sngewsih.
Ïa kane ka hukum yn pyntreikam da ka ophis jong u DFO, Social Forestry Ri Bhoi District, bad Soil and Water Conservation.
