Nongpoh, Nailur 15: Ka Risyon Sports Club, Shillong ka ba dei kawei na ki kynhun kaba peit ïaki kam ïalehkai sports hapoh ka jylla mynta ka sngi ka la ïoh ban plie pyrda noh ïaka Risyon Gift Grassroots Initiative Football Tournament ha madan ïalehkai jong ka shnong Malong, Ri-Bhoi District ïakaba la wan ban plie da u Bah Plielad Tiewsoh, Chairman ka Ri-Bhoi Tourism & Environmental Development Forum kum u konsan.
Ha kane ka lympung la wan ban ïashimbynta haduh 23 tylli ki kynhun kiba napoh ka them Ri-Bhoi bad ha kane ka sngi plie ka jingïalehkai ba nyngkong kala long hapdeng ka NewStar FC (Mawlong) pyrshah ïaka Umdohkha Them FC.
U Samla SK Mallai Dkhot jong Risyon Sport Club u la ïathuh ba kane ka jingthmu jong ka kynhun ban pynlong ïa kane ka lympung kynjat bol ka long ban ailad ïaki samla ba kin ïashim bynta haki kam ïalehkai phutbol bad lyngba kane ka tournament kin jied ruh ïaki rangïalehkai ki ban mih khmat naka kynhun jong ki sha ki lympung bapher bapher.
Shuh shuh u la ïathuh ruh ba ïa kane ka lympung kynjat bol yn sdang shwa ban pynïalehkai ha Ri-Bhoi District bad yn sa bteng pat shakiwei kiwei ki district.
