Ban sei ïa ki samla ba tbit ha ka ïa mareh thong cycle, pynlong ka RBCA da ka jingïameh thong cycle ha Ri Bhoi

Nongpoh, Risaw 05: Ka Ri Bhoi District Cycling Association kum shi bynta ban pynpaw pyrthei halor ki kam ïa mareh thong cycle kaba long kawei na ka jingïalehkai sport, ha ka sien kaba nyngkong mynta ka sngi ka la pynlong ïa ka jingïamareh thong cycle ba la tip kum ‘ District Level Cycling Race’ ha Pahamsyeim ba la wan ban shim bynta da ki khun samla ka dong Ri Bhoi.
Kane ka jingïamareh thong cycle la sdang na ka Shnong Pahamsyiem sha Umdihar bad na Umdihar sha ka thaiñ Marngar bad la pynkut pat ha Madan Umbuda ha kaba 12 ngut ki samla ki la shim bynta ha kane ka jingïamareh thong cycle.
La pynlong ruh ïa kane ka District Level Cycling Race ka dei ha ka jingïalam u Bah Wanphrang Sumer kum u President bad u Bah Mihpli Wahlang kum u Secretary bad la pynlong ruh ïa kane ka jingïamareh thong lyngba ka cycle ka long shi bynta ruh kum ka jingpyntbit (trial) na ka bynta ban ioh ba jied ïa ki samla ban mihkhmat ïa ka district sha ka State Level Cycling Race ka ban long ha Nongbah Shillong.
Ha katei ka jingïamareh thong Cycle la wan ruh ban ïashim bynta da ka Secretary jong ka Meghalaya Cycling Association, ka Kong Jesenta Leewait haka jingïadonalng jong u Bah Barnis Tiewla uba dei uwei na ki dkhot katei ka Association bad kiwei kiwei ki dkhot ka Association.
Ha katei ka jingïamareh thong bicycle ka Ri Bhoi District Cycling Association ka la buh ïaka jingjngai kaba 28 KM bad U Gilbert Lamare uba ioh ïaka Chess Number 10 u la iohrah ïaka kyrdan ba nyngkong da kaba pyndep ïa katei ka jingïamareh thong da 1 kynta 36 minit 9 second, nangta u Victor Wahlang uba ioh ïaka chess number 11 u la ioh rah ïaka kyrdan baar da kaba pyndep da 1 kynta 36 minit 36 second bad u Bah Mihplie Wahlang uba dei u Secretary ka Association u la iohrah ïaka kyrdan kaba lai da kaba pyndep da 1 kynta, 43 minit 52 second.
Kumba la pyntip da ki nongïalam ka Association, la ong ba kiba jop na kane ka lympung kin ioh ïa ka lad ban leit ïa shim bynta haka state level Cycling Race ka ban sa long haka 8 tarik u Risaw 2022 ha nongbah Shillong da kaba hap ban ïa thew jingkhlain ban pynïamareh cycle bad kiwei pat ki nongpynïamareh kiba na kiwei kiwei ki District. Nalor jong kitei ki 3 ngut kiba la wan shakhmat la jied ruh sa lai ngut ki ban leit ïashimbynta haka State level Cycle Race kiba kynthup ïa u Sunil Marai, U Wanteibok Lyngdoh, bad u Ashok Rai.