Nongpoh, Risaw 05: Da ki hajar ki paid riewngeit Hindu hapoh ka thaiñ Nongpoh ha Ri Bhoi District mynta ka sngi ki la shim bynta shitrhem ha ka jingpyndep ban leh niam ïa ka Durga Puja, kaba dei ruh ka jingleh niam ban pyndep ïa ka jingleh niam ne lehkmen ban leit bret pat ïa ka blei sha ki wah kaba dei katkum ka jingngeit tynrai ki riewngeit Hindu ha ka ri hi baroh kawei.
Kumba ki la lah ban pyndep ïa ka leh niam puja naduh ka Maa Durga, ka Maa Saraswati bad ka Maa Lakshmi bad mynta ka sngi ki la leit ban pyndep ïa ka leh niam ha kaba leit bret pat ïa ka blei sha ki wah ba ki la pynbeit ban pyndep ïa ka niam ka rukom.
Lyngba ka Nongpoh Kali Mandir Puja Committee, ki paid riewngeit Hindu ha ka thaiñ Nongpoh ki la shim bynta shitrhem ban leit bret ïa ka blei ha ka Wah Byrnihat bad la sakhi ruh naduh longkmie, ki longkpa, ki samla bad ki heprit kiba dei na ka jingngeit Hindu ki la shim bynta da ka jingkmen ban pyndep ïa kane ka leh niam puja ban ainguh aidem ïa kita ki blei kiba dei katkum ka tynrai jingngeit jongki.
Haba pyndep ïa kane ka lehniam bret blei la ïalam da ki nongïalam ka Nongpoh Kali Mandir Puja Committee ba kynthup ïa u Kokon Baroi kum u President, u Babul Roi kum u Secretary ryngkat ki nongïalam niam ka niam Hindu na Nongpoh.
Ki paid Hindu ha Nongpoh ki la ioh ruh ban pyndep ïa kane ka leh niam puja khlem da don kano kano ka jingpynthud kaba ktah ïa ka shongsuk shongsain bad la sakhi ruh wat ki bor synshar district ki la long kiba peitngor ban nym mih kano kano ka jinghuri hura ha kane ka leh niam puja ki paid riewngeit Hindu.
Kumba ki la pyndep ïa ki jingleh niam bapher bapher naduh ka Maa durga, maa Sarawati bad ka Maa Lakshmi bad mynta ka sngi pat lyngba ka Nongpoh Kali Mandir Puja Committee ki la pyndep syndon ïa kane ka leh niam puja da kaba ki la leit ban bret ïa ka blei ha ka wah Umtrew kaba don ha Byrnihat.
Haba kren na ka liang u Assistant Secretary ka Nongpoh Kali Mandir Puja Committee, u Ashit Dutta, u la pynpaw ka jingkmen ba kum ki paid riewngeit Hindu ki la lah ban pyndep hok ïa kane ka leh niam puja bad kane ka jinglah ba pyndep ïa ka leh niam puja kum kata ka jingainguh ïa ki Blei ka dei namra ba la ïa snoh kti lang ym tang ki paid riewngeit Hindu, hynrei ki nongshnong ka thaiñ Ri Bhoi hi baroh kawei.
U la pynpaw ruh ka jingai khublei naduh ki nongïalam Shnong, ki nongïalam ka Nongpoh Town Committee, ki nongïalam niam bapher bapher bad kumjuh ruh ki bor synshar District, namar dei ka jingïatrei lang jongki ba ki paid Hindu ki la lah ban pyndep ïa kane ka leh niam Puja.
Shuh shuh, na ka liang u Ashit Dutta kum u nongïalam ki paid riewngeit Hindu ha Nongpoh u la phah ruh ka khubor sha baroh ki paidbah nongshong shnong ka Ri Bhoi ba ngin dang don ka jingïatrei lang ha baroh ki liang khlem da thew ïa ki niam bapher bapher bad ka jingïatrei lang na baroh ki liang ngin lah ban wan rah ïa ka shongsuk shongsain ki paidbah bad ruh ba ki paidbah ha Ri Bhoi ki dang kiew shaphrang ha baroh ki liang haba don kata ka shongsuk shongsain ha ka imlang ka sahlang, u la bynrap.
