Ban pyrshah ïa ka hukum pynlong kongsan ïa ka TET, rai ka sorkar ban mudui biang sha SC

Shillong, Risaw 27: Ka Sorkar Jylla ka la pyntip ba ka la rai ban mudui ïa ka jingdonkam ban bishar biang (review petition) ha Ïingkashari Supreme Court (SC) kaba long pyrshah ïa ka hukum kane ka Ïingkashari ba pynmih ha ka 1 tarik Nailur 2025, kaba pynlong kongsan ïa ka Teachers Eligibility Test (TET) ïa baroh ki nonghikai ba don ha ka kam, kam pher ïa ki snem ba ki la shakri ha kane ka kam.
Halor kane u Myntri ka Tnad Pule Puthi ka sorkar jylla u Bah Lahkmen Rymbui ula pyntip ba ka nongrim jong ka Sorkar ka long ba kane ka hukum ka dei kaba ktah ïa ki snem ba la leit noh bad ka kwah ba ka Ïingkashari Supreme Court kan pyllait noh ïa ki nonghikai kiba la thungkam ha shuwa ban treikam ka Right to Education (RTE) Act.
Haba kren sha ki lad pathai khubor u la ong, “Ka jingbym sngewïahap jong ngi ka long ba kane ka hukum ka Supreme Court ka don jingktah ïa ki snem ba la leit noh bad kaei kaba ngi kwah ka long ba dei ban pyllait noh ïa ki nonghikai ba ïohkam shuwa ka RTE Act na ka eksam TET.”
U la ong, “Hadien ka jingwan jong ka RTE bad ka jingpynbna ba bud jong ka NCTE kaba dei ka bor pynïaid ïa ki skul Elementary bad Primary, kila buh ïa ka kyrdan na ka bynta ki nonghikai ïa kaba ngim shym la pyrshah eiei ruh em.”
U Bah Rymbui u ïathuh ruh ba haduh 32,000 tam ki nonghikai kin sa shah ktah ha kane ka hukum, kaba mut ba kin hap ban pass ïa ka TET hapoh ka arsnem.
Ula pynpaw ïa ka jingsngewkhia da kaba pyntip ba bun na kine ki nonghikai lehse kin nym lah satia ban pass ïa ka TET hapoh ka por ba la buh kumba ka dei ban long.
U Bah Rymbui ula pynshai ruh ba ki nonghikai kiba la dep pass ïa ka Meghalaya Teachers Eligibility Test )MTET) lane ka Central Teachers Eligibilty Test (CTET) kin ym donkam shuh ban ïakhun ïa kiwei pat ki eksam TET bad ka kam jong ki ka long kaba shngaiñ lypa.
Halor ka jingai jingmut jong ka State Education Commission ban weng kam noh ïa ki nonghikai ki bym pat biang kyrdan, u Bah Rymbui ula ong ba kane ka shong ba kumno la pynwan ïa ka namar ka Sorkar ka la thung ïa ki nonghikai katkum ki kyndon ba la buh da ka National Council for Teacher Education (NCTE).
U la ong, “Kane ka mut ba baroh ki dei ki nonghikai kiba la biang kyrdan.”
U la banjur ba ka jingbishar ka Supreme Court ka la pynlong kongsan ïa ki nonghikai ba dang shakri kiba pass ïa ka TET hapoh ki 2 snem, hynrei lada ka court ka wanrah jingkylla, kan sa long pat da kawei ka bynta.
“Haba ong ba shisien ba ki la pyndep ïa baroh ki jingdonkam, kaba mut ba ki la long kiba la tbit bad kiba bit dor,” u la bynrap.