Shillong, Risaw 27: Ka Shillong Law College ka la pynlong ïa ka sngi ai burom ïa ki samla pule kiba la pyndep ïa ka Graduate na ka bynta ka jingpule BA.LLB na ka bynta ka Batch 2020-25 bad kumjuh ruh na ka bynta kiba la pyndep ïa ka LLB 2022025.
Ïa kane ka prokram pynkup burom la pynlong ha ka sngi nyngkong da ka Students’ Bar Association ha kaba ki la don bun ngut ki samla pule, Principal, nangta ba kynthup ïa ki nonghikai, bad kiwei kiba la shah khot sngewbha.
Ha kane ka sngi na ka liang kiba pynïaid bad kiba pynlong ïa kane ka prokram ki la pynithuh ïa baroh kiba don bynta kiba kham hakhmat bad hadien kane la pynbud pat da ka jingrwai ïa ka Anthem jong ka College bad ki kyntien pdiang sngewbha na u Principal Dr. Shariffuddin ha kaba u la pynpaw ka jingai burom ïa baroh kiba la don bynta ha kane ka prokram.
Ha ka prokram kaba kyrpang jong ka jingpynkup burom ïa ki samla pule la wan ban long kongsan da Senior Advocate High Court ka Meghalaya VK Jindal ha ka jingdonlang ruh ka Vice Principal ka Dr. M Kharshiing bad ki dkhot ka Governing body bad kiba trei ha kane ka jaka pule aiñ.
Ïa u kongsan la pynkup burom da u Prncipal ha kaba hadien na ka liang jong u, u la sam ïa ki khusnam ha ki palat 100 ngut tam ki samla pule kiba la pyndep ïa ka jingpule LLB ba BA.LLB jong u ne u snem 2025.
Haba kren kum u kongsan u VK Jindal u la ai mynsiem bad pynshlur ïa ki samla pule kiba la pass ba kin ïaibteng ha kane ka jingpule jong ki ïa ka aiñ bad ong ruh ba kane ka jingpass ka danglong ka jingsdang bad ba ka lynti ka dang dei kaba dang hab ban ïaid khnang ban poi sha ka thok jong ka jingtbit bad ka jingshemphang ïa kane ka subjek kaba ïar.
Katba na ka liang ki samla pule kiba la khamrim ki la ai jingkren ai mynsiem bad hadien kane la don pat sa ka jingai jingrwai bad ka jingtem jingput kaba la pynphuh pynphieng ïa kane ka jingrakhe jong kane ka mawmer ka jingïaid lynti jong ki samla pule bad khamtam jong kane ka College.
Ka la don ruh ka jingai khusnam kaba kyrpang ban ithuh ïa ka jingnoh synniang bad ki jingjop jong ki arngut ki samla pule.
Haba pynkut ïa ka prokram la ïoh ka jingkren ai khublei na ka Dr. M Kharshïing Vice Principal bad pynbud pat sa ka jingrwai ïa ka National Anthem bad kiwei kiwei pat ki prokram.
