Nongstoiñ, Risaw 27: U Bah Prestone Tynsong haba ai jingkren ha ka jingïalang pynkut ïa ka lympung phutbol ha madan New Nongstoiñ, u la kren shai ba na ka liang ka sorkar ka la mang lane estimate kumba 22 klur tyngka ïa ka surok ba 7 kilometer kaba napoh sor Nongstoiñ shaduh Sohpian.
“Mynne nga dang ïaid ïa katei ka jaka naduh Sohpian haduh Nongstoiñ bad nga ruh nga I sahnud bha, namar ynda nga la rung shapoh Nongstoiñ ka surok nangtei na Sohpian ka long kaba rit lane single lane. Te nga kwah ban pynbna ha ki paidbah jong ka sor Nongstoiñ ha kane ka por, ba na ka liang ka sorkar ngi la dep pynkhreh ïa ka estimate bad shen ngin sa ïoh ïa ka sanction kaba 22 klur tam na ka bynta kane ka surok”, ong u Bah Prestone hakhmat ki hajar ki paidbah kiba la wan shakhi ïa ka jingïalehkai final phutbol ha madan New Nongstoiñ.
“Kane ka jingpynbna paidbah jong nga ka long namar ba kane ka sor Nongstoiñ, ka dei kawei na ki nongbah ba la rim tam. Ka dei ka District Head Quarter kaba la rim tam hapoh ka jylla ka jong ngi bad ruh kaba donkam tam ha kine ki juk bad ki sngi kiba mynta. Nga kwah ban ong ba ka jingkmen jong ngi ka sorkar bad phi ki paidbah ka long ba ngi don ryngkat ryngkat, ha kaba ki dang bun kiwei kiwei pat ki project kiba ngin sa nang leh ha ryngkat u MLA jong phi na ka bynta ka lawei jong ka Nongstoiñ bad ka District baroh kawei”, u la ong.
