Dang pynkhreh ka sorkar ïa ka rukom treikam thymmai ban siew tulop nonghikai: Lahkmen

Shillong, Risaw 27: Ka Sorkar jylla ka dang pynkhreh ban wanrah noh da ka rukom siew tulop kaba la pynkhreh bha ïa ki nonghikai ha ka jylla hapoh jong u bnai Nohprah une u snem, pynbna u Myntri ka tnat Pule Puthi ka sorkar jylla u Bah Lahkmen Rymbui ha ka sngi Nyngkong.
Haba jubab ïa ka jingkylli halor ka kyrdan jong ka jingtyrwa ban shimti ïa ki 3,332 tylli ki skul SSA, kiba la aiti ïa ki No Objection Certificate (NOCs) ban aiti ïa ki jingpynïaid kam sha ka sorkar jylla, u Bah Rymbui u la ïathuh sha ki lad pathai khubor ba ka sorkar ka la sdang ïa ki jingïasyllok bad kiba bun ki nongshong shnong, kynthup ïa ki seng kiba mihkhmat da ki nongtrei SSA, kiba la dawa ïa ka rukom siew kaba la pynkhreh bad ka jinglong shngaiñ ka kam.
U la ong ba u Myntri Rangbah u la pdiang ïa ka jingdawa halor kane ka rukom siew tulop bad ka sorkar ka dang trei ïa ka kam ban pyntreikam ïa ka.
“U Myntri Rangbah u la dep pdiang bad ka sorkar ka dang trei la ka bynta haba ïadei bad ka jingsiew tulop kaba la khreh hapoh jong u bnai Nohprah 2025,” ïathuh u Bah Rymbui.
U Myntri u la bynrap shuh da kaba ong, “Shisien ba ngi la jop ïa kane ka kam baroh kiwei pat ki kam kin sa ïaid beit. Kumta ka sorkar ka dang pynkhreh ïa ki rukom treikam hynrei kumba ka long mynta ngin ïa peit kaei kaba ka sorkar ka lah ban leh ban ïasyllok bad kiwei ki nongshong shnong hapoh kine ki 2 bnai.”
U Myntri u la banjur ba ka sorkar ka donkam ban peit lang ïa ki tyllong jingwan ka pisa ban kyntiew ïa ka bynta jong ka imlang sahlang, kynthup ka pule puthi, khlem da ïapeiñ ïa kiwei pat ki bynta.
“Ha baroh ki liang, ka don ka jyrwit jyrwat ha ka kam pisa. Kumta ngi hap ban peit kano na kine ba ka sorkar kan lah ban leh, kumba la ong ba donkam ban kyntiew lang ïa kiwei ki tnat. Da kaba pyndon ïa ka jingsiew ba la pynkhreh, kam mut pat ba kiwei ki shnat kin mad jingeh. Ngi hap ban peit lang. Kumba ka long mynta ka dang long kaba kloi palat ïa nga ban ong eiei,” u la ong da kaba bynrap, “Ngi donkam ban ïasyllok ïa baroh ki nongshong shnong bad ka jingdon ki jyrwit jyrwat ngin sa ïa sam lang, namar ka sorkar kam dei na ka bynta jong ngi hynrei na ka bynta ki paidbah.”
“Kaei kaba nga sngewkmen bha ka long ba manla ki jingïalang bad ki seng, baroh ki ai jingmut,” u la ong.
Haba kylli la kane ka jingtyrwa ka dei shi bynta na ka jingthmu ka sorkar ban pyntreikam ïa ka Meghalaya Education Grant (MEG), u Bah Rymbui u la ong ba kane ka jingleh kadei ka bynta ka jingpyrshang ka sorkar kaba dang ïaid ban pynkylla ïa ka pule puthi, kaba la kular da u Myntri Rangbah ha u snem.