Lyngba ka Seminar la kren halor ka hok jong ka sawdong sawkun, ka bynta ki longkmie, ki samla

Shillong, Risaw 27: Ka Department of Social Work (UG) bad ka Department of Environmental Science, St. Edmund’s College, Shillong ka la ïoh ban pynlong ïa ka International Seminar kaba arsngi halor ka phang “Indigenous Science Development: Intersecting Traditional Knowledge, Scientific Inquiry, and Socio-Cultural Practices” ha ka 24 bad 25 tarik mynta u bnai.
Ha ka 24 tarik ka la don ka jingkren lamphang ba la ai da ka Medha Patkar, ka social activist kaba paw khmat, bad ka Ridhima Pandey, ka nongtrei monsngewbha halor ka jinglong ka mariang, ha kaba baroh arngut ki la sam ïa ki jingtip halor ka hok ka sawdong sawkun, ka jingpynkup bor ïa ka kynhun, bad ka jingdon bynta jong ki longkmie bad samla ban trei na ka bynta ka jinglong ka suiñbneng bad ki jingtip halor ki kam longshwa manshwa bad ban pynneh pynsah ïa ki.
Ïa ka sngi kaba nyngkong la pynkut da ka cultural programme bapher bapher ba la ai da ki local artist na ka tnat Arts and Culture, ka sorkar jylla bad ka jingdon ki jingshad kum ka Wangala dance, ka Shad Mastieh bad Shad bet symbai. Ha kane ka sngi la wan ban don bynta da u kongsan u P. K. Boro (CEO ka Shillong Municipal Board).
Ha ka sngi baar la pynsdang da ka jingkren da Dr. Jacqui Rémond bad Theressa Adler kiba na Australian Catholic University. Ki la banjur halor ka phang “First nations country, language and cultural ways of being, knowing and living in Australia”. Ka Sr. Elizabeth Carranza na ri Philippines ska la kren halor ka “Socio-Cultural Embeddedness and Global Perspectives on Indigenous Science.” Ka la kren ruh shaphang ka rukom ri jingri, ka jingtyngkai ïa ki khlaw kiba la leh da ki trai ri trai muluk kaba la tip da ka Egarot.
Hadien kane la pynbud da ka rynsan ïasyllok ba la lamkhmat da ki riewshem phang u Bah Tambor Lyngdoh, ka Mayfereen Ryntathiang, u Bah H. H. Mohrmen bad Prof. S. Dkhar.
Ha kane ka seminar la donlang ki riewshemphang kiba wan na ki ri bapher bapher kiba la ïasyllok ha ka jingtip jong ki trai ri trai muluk kiba ïaid katkum ka saïan kaba mynta. Ki la don palat 40 tylli ki jingthoh kiba la wanrah ha ki jingkren bapher bapher ha kaba ki la don kiba ïa shim bynta na jylla Assam, Mizoram, Sikkim, Kolkata, Tripura, Mumbai, na ri Bangladesh, bad Berlin (Germany).
Palat 500 ngut ki la wan ban shim bynta ba kynthup ïa ki samla pule na ki tnat bad ki college bapher bapher kiba la don bynta ha kane ka seminar.
Ka la don ruh ka poster competition bad ka reel competition bad ki la don ruh ki jingpyni ïa ki rukom pynkhiah ba la leh da ki mynbarim bad ka ethnomedicine, eco-tourism bad ka jingpynneh pynsah ïa ki jingthung bad kiwei kiwei kiba jingkren kiba long katkum ka NEP 2020. La pynlong ruh ïa ka NGO Mela, nalor kiwei kiwei ki prokram.
Ïa ka seminar la pynkut da ka jingkren ai khublei bad ka jingsam ïa ki khusnam bad ki syrnot ba la sam da Dr. H. Tynsong (Scientist E, Director, Ministry of Environment, Forest and Climate Change).