Lada kwah ban ïakren pynbeit dei ban pynlong ha kane hi ka jaka ba ïakhih ong ki Trok

Jowai, Risaw 27: Ka Meghalaya Commercial Truck Owner and Drivers Association (MCTODA) Jaiñtia Unit, mynta ka sngi 27 tarik ka la pynlong ia ka jingïakhih ba jai jai naduh ka por 9 baje mynstep.
Hynrei, na ka liang ki nongialam jong ka MCTODA hapoh ka jingialam jong u Wanchwa Nongtdu uba dei u nongaiktien ka MCTODA Central Body la kynnoh ba dei ha ka por 2baje duna ei ei ki pulit ki la pyrshang ban bat ïa ki trok hapdeng lynti bad thmu pynsakut ïa ka surok.
Lah ban kdew hangne ba ka jingkhot pynlong ïakhih da ka MCTOCA-JH kaba kynthup ïaki nongñiah trok bad ki trai trok trai jylla la pynlong ha Wahlartein NH-6 jong u surok Jowai Bypass Khliehtyrshi, shi bynta ban dawa ïaka dor jong ka bai kit ïa u Clinker na ki Company Cement kaba long katkum ka dor bala dep pynbeit da ka sorkar.
Na ka liang u nongaiktien MCTODA Central Body u bah Wanchwa Nongtdu ula ong kane ka jingthmu ban bat ïa ki trok da ki pulit ha ka por 1:43 nohphai sngi kala long kumba ïuhroit ïaka hok kaba ki dawa ban ïoh. U ong man ki por ba pynlong ïa ki Public Hearing da ki Kharkhana kaba nyngkong ki juh kular ban buh shwa nyngkong ïa ki trai jylla, hynrei kine ki jingkular kim long kiba shisha.
Kum u nongaiktien jong ka MCTODA u pynsngew ba kane ka jingïakhih jong ki ka long naka bynta ka lawei jong ki khun ki kti, kumba long mynta kiba bun na ki samla kim shym la ïoh ïa ka kam ka jam kaba pura wad hadien ba kila pyndep ïa ki jingpule bapher bapher jong ki, la ong u ma Nongtdu.
Shuh shuh u ma Nongtdu ula ong ba don ki por ba haba ka seng ka pynlong jingïakhih bad bat ïa ki trok kit Clinker, hynrei don katto katne ki trai trok kiba pyndonkam da ki bor Pulit ban pahara ïa ki trok jong ki.
U General Secretary ka MCTODA Central Body u bah Peter Marbaniang u ong kane ka jingdawa ka long beit pyrshah ïa ki Kharkhana dewbilat ki bym shym la pyntrei ïa ka dor bala pynbeit bad buh da ka sorkar, ula kren ba kane ka jingïakhih kan dang ïaibteng haduh ban da ïoh ïa ka dor ba la ïakut.
Ka Meghalaya Commercial Truck Owner and Drivers Association (MCTODA) Jaiñtia Unit, kala pyntip ba kin bteng beit ïa kane ka jingïakhih haduh ban da ïoh ïa ka jingdawa. Shuh shuh ka seng ka kloi ban ïakren bad kitei ki heh jong ka Kharkhana bad ka jingïakren pynbeit kan long ha katei hi ka jaka ba pynlong ïa ka jingïakhih.
Kane ka jingïakhih bala khot pynlong mynta ka sngi da ka seng kala long kaba ïaid beit shakhmat, wat na ka liang ki bor District ka West Jaiñtia Hills District ki khlem da ai jingbit ban pynlong ïa kane ka jingïakhih namar ba ki pynpaw ba ka la lah ban ktah ïa ka ïaid ka ïeng ki paidbah.