La i artatien ïa ka lawei jong ka Congress ha ka Jylla, ong u Bah Sniawbhalang Dhar

Shillong, Risaw 27 : U nongïalam ka National People’s Party (NPP) u ba dei ruh u Symbud Myntri Rangbah ka jylla, Bah Sniawbhalang Dhar u la pynpaw ïa ka jingsngew artatien halor ka lawei jong ka seng Congress ha kane ka jylla Meghalaya.
Halor ka jingkylli la katei ka party ka la donkam ban kylliang nongïalam noh, na ka liang u Bah Sniawbhalang u la ong ba kam dei ka kam jong u ban kren eiei halor ki kam hapoh jong kawei pat ka party.
“Ngam lah ban kren eiei halor ki kam pohiing jong kawei pat ka party namar ki tip kham bha ban ïa ngi la donkam ne em ban pynkylla nongïalam ne em,” u la ong u Dhar haba kren bad ki lad pathai khubor ha ka sngi Nyngkong.
Hynrei u la bynrap pat ba ka long kumba ka jingtynjuh ïa ka Congress ba kan khie khlieh ha Meghalaya. “Na kaei kaba nga ïohi, kan long kaba eh shibun ïa ka Congress ban bteng ha Meghalaya. Hynrei aiu ngin ong ïa ka jinglong jingman jong kawei pat ka party?”
Lah ban kdew hangne ba hapoh ka jingïalam jong u Bah Vincent H Pala kum u President, ka Congress ka la sdang thymmai ha ka elekshon sha ka iing dorbar thawain ha u snem 2023 da kaba sei ïa ki dur khmat thymmai bad kumjuh ïa ki MLA barim bad ruh ki MDC ha kaba ka la ïoh ruh ban jop haduh san ngut.
Hynrei uwei na ki MLA u Saleng A Sangma u la shah jied noh kum u MP ka Tura kumta hadien kane, kiwei pat ki MLA ki la pynïasoh noh sha ka NPP kaba pynlong ïa ka Congress ban ym don MLA shuh mynta ha ka Iing Dorbar kaba don haduh 60 ngut ki dkhot.
Haba kren shuh shuh halor kane, u Bah Sniawbhalang u la ong ba kum ka paw hi ki paidbah ki tip kham bha ban bishar halor kano kano ka party. Tangba u ong pat ba ka jinglong jingman ha katei ka party kam da itynnad shuh mynta.
Halor ka jingkylli la ka NPP kan pyrshang ban khring noh ïa u Bah Pala sha ka party, une u nongïalam ka NPP u la ong, “Ïa mynta hi ngim pat leit khroh ïano ïano ruh namar ka elekshon ka dang jngai bha.”