Shillong, Risaw 27 : Ki la don haduh san ngut ki nong Bangladesh kiba la shah kem ha ki pulit ha ka jingkhynra lang kaba la pynlong da ka Special Cell jong ki pulit ka Jylla ryngkat ka Special Operation Team (SOT) ha lad ISBD, Mawlai Mawiong ha ka miet sngi u Blei.
Katkum ka kyrwoh na ki pulit la ïathuh ba kine ki briew ki shong da kawei ka kali kamai kaba don ïa u registration number ML 05C 1358.
Shuh shuh la ïathuh ba kine ki briew ki dei kiba tip kyrteng kum ka Lelepa Begum (40), Musanat Jahana Khatoon (35), Md Imammul Hassan (18), Md Alamgir Mia (25) bad u Md Fajid Bilal (47), la pyntip u SP ka East Khasi Hills, BahVivek Syiem ha kane ka sngi Nyngkong.
La ïathuh ba kine ki briew ki mih na Srinagar ban wan sha Shillong bad leit phai pat sha Bangladesh.
La ïathuh ruh ba ha ka jingtohkit sdang, la pawe ba kine ki briew kim don satia ïa ki kot ki sla kiba biang bad ki kam ruh ba ki dei ki nong Bangladesh.
Halor kane, ki pulit ki la rejistar noh da ka criminal case ha Mawlai Police Station ban tohkit shuh shuh halor kane ka kam.
