Jowai, Ïaïong 10: Ka Jaiñtia Fishing and Environmental and Protection Association (JFEPA), kawei ka Association ha Rilum Jaiñtia kaba ïaleh ban pynneh pynsah ïa ki dohum dohwah na ka jingshah pynïap pathar.
Na ka liang ka seng JFEPA hapoh ka jngïalam u ma D.H. Pde President ha ryngkat u General Secretary ma M. Challam bad kiwei de kila hiar jurip sha ka shnong Amlanai kaba don hajan Muktapur, Amlarem Civil Sub-Division kaba long kawei na ki Unit jong ka JFEPA ban leit buh ïa u Maw- nongrim ne u maw sah nam kum ka dak ban pyndonburom ïa ki longshwa manshwa ïa ka Association ha kane ka shnong.
Ïa une u mawnongrim la buh harud ka wah Lakyntiang kaba long kawei na ki wah kaba peit bad sumar da ka Jaiñtia Fishing And Environment Protection Association, Amlanai Unit.
Ha kane ka sngi la don ruh ka jingïalang ba lyngkot ba la pynïaid da u Waheh Shnong u ma Jendis Khongiong, la ïoh ruh ïa ki kyntien khublei da u Secretary u ma Samuel Gashnga, la ïoh ruh ki jingkren na u President JFEPA ma D.H. Pde, ma Wom Pakynteiñ Ex-General Secretary, I/C Muktapur Out Post, ma S.I. Pala bad kiwei de.
Kum ka seng ha ryngkat ka shnong Amalnai kiba peit ïa ka bha ka miat jong u dohum dohwah ki la kyrpad jur bad maham ruh ïaki paidbah kane ka thaiñ ba kim dei ban pynïap pathar ïa ki dohkha dohpnat ha kane ka wah bad la khang pyrshah ruh ban wieh dawai, ne pyndonkam da ki bom ne da ka Jar.
Ha ka juh ka por la mana jur lada lap ïa kino kino kiba leh pyrshah yn pynshitom katkum ki kyndon aiñ bad ka kuna ba heh bala buh da ka shnong bad JFEPA Amlanai Unit.
