Kyrpad ka KSU Huroi ïa ka sorkar bad ïa ka MLA ba sniew palat ka surok ha ki shnong khappud

Khliehriat ïaiong 10 : Ka Khasi Students Union Huroi Unit, lyngba ki pathai khubor, ka buh ïa ka jingkyrpad ïa ka sorkar jylla bad kumjuh ruh ïa ka nongmihkhmat jong ka Sutnga Saipung Constituency, ka kong Santa Mary Shylla, ba kin ïarap lem bad sngewlem ïa ki paidbah kiba shong ha ki shnong ba khappud bad ka ri Bangladeh, ba kynthup ka Huroi, Lahaleiñ, Lejri ter ter, namar ba ki ïakynduh jingeh palat na ka daw ka jingsniew palat ki surok, ki da pynpaw ruh ba ki donkam jingiarap noh mar mar namar ba ki paidbah jong ka thaiñ ki don mynta hapdeng ka jingeh kaba khraw ha ka leit ka wan.
La pynpaw ruh ba namar ka jingsniew palat ka surok, ki paidbah ki kynduh jingeh ha ka kit ka bah, khamtam ha kaba kit ia ki mar bam, mar dih sha ki shnong bad khamtam eh haba wan lap ka pang ka shitom, namar ka jingpyntrei thymmai ia ka surok mynta ha khappud, ki paitbah ka thaiñ shnong bad ki im mynta ha ka jinglong ba i sangsot bad ba kordit haduh katta katta.
“Ka jingsniew jong ka surok dei namar ka jing ktieh bad jyrsieh ka kaba la palat, wat tang ban leit ïew leit hat, leit shim dawai ki paitbah ka long jynjar haduh katta katta ba kin ïaid na ka surok ba jyrsieh” ong u kyrwoh na u President KSU Huroi Unit, u samla Wallam Lamin Gadew, u la kyrpad jur ruh ïa ka sorkar bad ïa ki bor ba dei khmih ba kin phai khmat noh kham kloi sha kane ka thaiñ khappud ban pyllait ïa ki paidbah na kine ki jingeh ba ki ïakynduh.
Na ka liang ka seng, ka aijingmut ruh ïa ka sorkar bad ki bor ba dei peit ba kin phah da ki puh shilum (JCB) sha katei ka thaiñ khnang ban dup lah ban ban tong bad pynkhuid ïa kitei ki ktieh kiba jyrsieh bad satah, kiba buh jingeh haduh katta katta ïa ki kali ban ïaid ha katei ka surok ba jyrsieh.