Ba khyllem ka jingkieng ïaid kjat ha Shangpung ujor ejahar ka HITO

0

Jowai, Ïaïong 09: Ka Hynñiewtrep Integrated Territorial Organisation (HITO) Shangpung Area mynta ka sngi kala ujor syndon da ka ejahar (FIR) ha Raliang Police Out Post, West Jaiñtia Hills District, halor ka jingkhyllem ne hap jong kawei ka jingkieng ïaid kjat kaba dang shu shna thymmai dang ha kine ki khyndiat sngi da ka tnad jong ka Soil and Water Conservation ha Moolishah, kaba hap hapoh ka shnong Khliehmuchut Shangpung.
La ïathuh ba kane ka jingkieng ïaid kjat kala khyllem hynin ka sngi U Blei jong ka 9 tarik u Ïaïong ha ka por kumba 1:15 mynsngi eiei. Katkum katei ka FIR ba la ai da u President bad General Secretary ka HITO Shangpung Area ha thanat Raliang, la ong ruh ba kane ka jingkhyllem ka dei namar ka daw jong ka jingleh sting ka tnat kaba pyntrei ïa kane ka jingkieng bad kata ka dei ka Soil and Water Conservation jong ka sorkar jylla.
Ha ka jingïadei na ka liang ka HITO kala kyntu ïa ki pulit ba kin tohkit mardor halor katei ka jingjia bad ban pynsaja katkum ki kyndon jong ka Prevention of Corruption Act 1988 namar katei ka jingkhyllem kala long na ka daw jong ka jingbym ler ka tnat Soil and Water Conservation ban pyntrei katkum ka Mang tyngka ba la bhah.

Leave A Reply

Your email address will not be published.